Jetisý oblysynda aýyr júk kólikteriniń avtomattandyrylǵan salmaq ólsheý stantsiiasyn ainalyp ótý faktileri anyqtaldy. Tasymaldaýshylar «Saryózek – Kóktal» jolyndaǵy baqylaý beketin ainalyp ótý úshin tehnikalyq joldy paidalanǵan, dep habarlaidy dalanews.kz.
Osy jaǵdaidan keiin «QazAvtoJol» salmaq baqylaýynan qasaqana jaltaratyn júrgizýshilerge qatysty jaýapkershilikti naqtylaýdy usyndy. Kompaniianyń málimetinshe, respýblikalyq mańyzy bar joldarda 46 avtomattandyrylǵan ólsheý stantsiiasy jumys isteidi.
Jetisýdaǵy jaǵdai boiynsha Bas kólik prokýratýrasynyń úilestirýimen «QazAvtoJol» arnaiy tehnika tartyp, aýyr júk kólikteri paidalanǵan ainalma joldy japty. Qazir kólikter salmaq baqylaýynan avtomattandyrylǵan stantsiia arqyly ótip jatyr.
Kompaniianyń málimetinshe, keibir júrgizýshiler baqylaýdan jaltarý úshin jol jiegindegi zańsyz kirip-shyǵý joldaryn nemese tehnikalyq ótkelderdi paidalanady. Kei jaǵdaida avtomattandyrylǵan ólsheý stantsiialaryna qoiylǵan kedergilerdiń de bógde adamdar tarapynan alynyp tastalǵany anyqtalǵan.
«QazAvtoJol» mundai áreketterge naqty jaýapkershilik belgileý jáne biznes sýbektilerine qoiylatyn talaptardy birizdendirý qajet dep sanaidy.
Kompaniianyń túsindirýinshe, avtomattandyrylǵan ólsheý stantsiialary kólik qozǵalysyna kedergi jasaý úshin emes, júk kólikteriniń belgilengen salmaq jáne gabarit talaptaryn saqtaýyn baqylaý úshin ornatylǵan. Artyq júk jol jamylǵysynyń tez tozýyna jáne joldyń deformatsiialanýyna ákelýi múmkin.
«QazAvtoJoldyń» dereginshe, 2026 jyldyń alǵashqy segiz aiynda avtomattandyrylǵan ólsheý stantsiialary kólikterdiń ruqsat etilgen salmaǵyna qatysty shamamen 870 myń yqtimal zań buzýshylyqty tirkegen. Onyń ishinde salmaǵy 50 tonnadan asatyn kólikterge qatysty shamamen 139 myń, 100 tonnadan asatyn kólikterge qatysty 12 myńǵa jýyq jáne 200 tonnadan asatyn kólikterge qatysty myńǵa jýyq jaǵdai anyqtalǵan.
Budan bólek, jyl basynan beri salmaq jáne gabarit talaptaryn saqtamaǵan 22 myń tasymaldaýshy ákimshilik jaýapkershilikke tartylyp, olarǵa jalpy 6 mlrd teńge aiyppul salynǵan. Artyq salmaqpen kólik shyǵarýǵa múmkindik bergen 363 kásipkerlik sýbekt te jaýapqa tartylǵan.
«QazAvtoJol» avtomattandyrylǵan baqylaý júiesin ainalyp ótý áreketteriniń aldyn alý úshin injenerlik-tehnikalyq sharalardy kúsheitýdi jalǵastyratynyn málimdedi.
