Жетісу облысында ауыр жүк көліктерінің автоматтандырылған салмақ өлшеу станциясын айналып өту фактілері анықталды. Тасымалдаушылар «Сарыөзек – Көктал» жолындағы бақылау бекетін айналып өту үшін техникалық жолды пайдаланған, деп хабарлайды dalanews.kz.
Осы жағдайдан кейін «ҚазАвтоЖол» салмақ бақылауынан қасақана жалтаратын жүргізушілерге қатысты жауапкершілікті нақтылауды ұсынды. Компанияның мәліметінше, республикалық маңызы бар жолдарда 46 автоматтандырылған өлшеу станциясы жұмыс істейді.
Жетісудағы жағдай бойынша Бас көлік прокуратурасының үйлестіруімен «ҚазАвтоЖол» арнайы техника тартып, ауыр жүк көліктері пайдаланған айналма жолды жапты. Қазір көліктер салмақ бақылауынан автоматтандырылған станция арқылы өтіп жатыр.
Компанияның мәліметінше, кейбір жүргізушілер бақылаудан жалтару үшін жол жиегіндегі заңсыз кіріп-шығу жолдарын немесе техникалық өткелдерді пайдаланады. Кей жағдайда автоматтандырылған өлшеу станцияларына қойылған кедергілердің де бөгде адамдар тарапынан алынып тасталғаны анықталған.
«ҚазАвтоЖол» мұндай әрекеттерге нақты жауапкершілік белгілеу және бизнес субъектілеріне қойылатын талаптарды біріздендіру қажет деп санайды.
Компанияның түсіндіруінше, автоматтандырылған өлшеу станциялары көлік қозғалысына кедергі жасау үшін емес, жүк көліктерінің белгіленген салмақ және габарит талаптарын сақтауын бақылау үшін орнатылған. Артық жүк жол жамылғысының тез тозуына және жолдың деформациялануына әкелуі мүмкін.
«ҚазАвтоЖолдың» дерегінше, 2026 жылдың алғашқы сегіз айында автоматтандырылған өлшеу станциялары көліктердің рұқсат етілген салмағына қатысты шамамен 870 мың ықтимал заң бұзушылықты тіркеген. Оның ішінде салмағы 50 тоннадан асатын көліктерге қатысты шамамен 139 мың, 100 тоннадан асатын көліктерге қатысты 12 мыңға жуық және 200 тоннадан асатын көліктерге қатысты мыңға жуық жағдай анықталған.
Бұдан бөлек, жыл басынан бері салмақ және габарит талаптарын сақтамаған 22 мың тасымалдаушы әкімшілік жауапкершілікке тартылып, оларға жалпы 6 млрд теңге айыппұл салынған. Артық салмақпен көлік шығаруға мүмкіндік берген 363 кәсіпкерлік субъект те жауапқа тартылған.
«ҚазАвтоЖол» автоматтандырылған бақылау жүйесін айналып өту әрекеттерінің алдын алу үшін инженерлік-техникалық шараларды күшейтуді жалғастыратынын мәлімдеді.
