Atlant muhitynda saparlap júrgen krýiz kemesinde qaýipti indet tarap, úsh adam qaitys boldy. Taǵy bir naýqastyń jaǵdaiy óte aýyr. Aldyn ala derekterge súiensek, bul hantavirýs bolýy múmkin, dep habarlaidy dalanews.kz.
Sapar kezinde syrqat belgileri baiqalǵan
Niderlandyǵa tiesili MV Hondius laineri Argentinanyń Ýshýaiia qalasynan Kabo-Verdege baǵyt alǵan. Oceanwide Expeditions kompaniiasyna qaraityn kemede shamamen 150 jolaýshy bolǵan. Jol-jónekei keme Antarktika men Folklend araldaryna soqqan.
Alaida Atlant muhityn kesip ótý kezinde birneshe jolaýshynyń densaýlyǵy syr berip, tynys alýlary qiyndaǵan. Jalpy alty adam dárigerlerdiń baqylaýyna alynǵan.
Úsh adam kóz jumdy
World Health Organization (Dúniejúzilik densaýlyq saqtaý uiymy) málimetinshe, naýqastardyń úsheýi qaitys bolǵan. Bir adam Ońtústik Afrikada jansaqtaý bóliminde jatyr.
Aita keteiik, ázirge hantavirýs tek bir adamnan ǵana zerthanalyq túrde rastalǵan, qalǵan jaǵdailar naqty tekserilip jatyr.
Alǵashqy naýqas kim?
Alǵash bolyp 70 jastaǵy jolaýshy syrqattanyp, keiin kóz jumǵan. Onyń denesi Áýlie Elena aralyna jetkizilgen. Biraz ýaqyttan soń onyń 69 jastaǵy jubaiynan da dál osyndai belgiler anyqtalyp, Ońtústik Afrikaǵa jetkizilgen. Alaida sol jerde jan tapsyrǵan. Úshinshi adamnyń denesi áli de kemede bolýy múmkin degen aqparat bar.
Jolaýshylardy túsirýge shekteý qoiyldy
Qazir keme Kabo-Verde astanasy Praia qalasynyń mańynda toqtap tur. Alaida jergilikti bilik jolaýshylardy jaǵaǵa shyǵarýǵa ruqsat bermegen. Bul jaǵdai naýqastardy der kezinde evakýatsiialaýǵa kedergi keltirip otyr.
Halyqaralyq uiymdar iske qosyldy
Keme iesi jaǵdaidy baqylaýda ustap otyrǵanyn aityp, jolaýshylarǵa kómek kórsetilip jatqanyn jetkizdi.
Al World Health Organization uiymy eldermen birlesip, naýqastardy evakýatsiialaý jáne qalǵan jolaýshylardyń qaýipsizdigin baǵalaý jumystaryn júrgizip jatyr. Qajet bolsa, kemedegilerge karantin engizý de qarastyrylyp jatyr.
