Pavlodar qalasynda bilim salasynyń 2 myńnan astam qyzmetkeriniń jeke derekteri tarap ketken, dep habarlaidy dalanews.kz.
Prokýratýranyń málimetinshe, qala mektepteri meditsinalyq tekserýlerge arnalǵan satyp alýlardy jariialaý kezinde konkýrs qujattaryna artyq aqparatty engizip jibergen. Nátijesinde qujattar ishinde qyzmetkerlerdiń anketalyq málimetteri, turǵylyqty mekenjailary men telefon nómirleri jariialanyp ketken.
Osylaisha 2065 adamnyń jeke deregi kez kelgen adamǵa qoljetimdi bolǵan. Qadaǵalaý organy bul jaǵdaidyń zań buzýshylyq qana emes, sonymen qatar qaýip tóndiretinin atap ótti. Sebebi mundai aqparatty alaiaqtar óz maqsatynda paidalanýy múmkin.
Tekserý qorytyndysy boiynsha barlyq derekter ashyq qoljetimdilikten alynyp tastaldy. Al kináli tulǵalar tártiptik jaýapkershilikke tartyldy.
Eske salaiyq, 27 sáýirde Almaty men Astanada qazaqstandyqtardyń jeke deregin satyp júrgender anyqtalǵan bolatyn. Tergeý materialdary boiynsha qylmystyq iske qatysýshylar zańsyz jolmen alynǵan aqparatty internet jelisinde satyp kelgen.
