Úkimet Shyǵys Qazaqstan oblysyndaǵy Ridder qalasynyń jylý júiesin jańǵyrtýǵa rezervten shamamen 1,8 mlrd teńge bóldi. Tiisti qaýlyǵa Premer-ministr Oljas Bektenov qol qoidy, dep habarlaidy dalanews.kz.
Atalǵan sheshim Qasym-Jomart Toqaev tapsyrmasyn oryndaý aiasynda qabyldanǵag. Bólingen qarajat qalanyń jylýmen qamtý júiesiniń senimdiligin arttyrýǵa jáne aldaǵy 2026–2027 jylǵy jylytý maýsymyna sapaly daiyndalýǵa baǵyttalady.
Jospar boiynsha qarjy jylý jelileriniń eń tozyǵy jetken 12 ýchaskesin jańartýǵa, sondai-aq Ridder JEO-daǵy №5 jáne №6 qazandyq agregattaryn kúrdeli jóndeýden ótkizýge jumsalady. Bul – qaladaǵy jylý infraqurylymynyń álsiz tustaryn júieli túrde qalpyna keltirýge baǵyttalǵan negizgi sharalardyń biri.
Úkimet málimetinshe, jóndeý jumystarynyń qajettiligi tehnikalyq tekserýler nátijesinde anyqtalǵan. Mamandar jylý júiesiniń turaqty jumysyn qamtamasyz etý úshin aldymen apatty jaǵdai qaýpi joǵary nysandardy aiqyndap, solardy jańǵyrtýǵa basymdyq bergen.
Ótken jylytý maýsymynda birqatar ýchaskelerde tozý belgileri men aqaýlar tirkelgen. Bul jaǵdai jelilerdi kezeń-kezeńimen jańartý qajettigin taǵy bir márte dáleldegen.
Jalpy alǵanda, qolǵa alynǵan jóndeý jumystary Ridderdegi jylý júiesiniń turaqtylyǵyn arttyryp, turǵyndardy úzdiksiz jylýmen qamtýǵa múmkindik beredi.
