Jol-kólik oqiǵasyna ushyraǵan burynǵy Májilis depýtaty Baqytjan Bazarbek áleýmettik jelidegi paraqshasynda málimdeme jasap, oqiǵaǵa qatysty túrli boljamdar men alypqashpa áńgimelerge jaýap berdi, dep habarlaidy dalanews.kz.
Onyń aitýynsha, qazir oqiǵa boiynsha sotqa deiingi tergep-tekserý júrip jatyr. Sol sebepti ózi men jubaiy tergeý málimetterin jariia etpeý týraly mindetteme alǵandyqtan, bolǵan jaǵdaidyń egjei-tegjeiin aita almaidy.
Baqytjan Bazarbek tergeý áli jalǵasyp jatqanyn, aldaǵy ýaqytta qajetti saraptamalar júrgiziletinin málimdedi.
«Quqyq qorǵaý organdary bolǵan jaǵdaidyń barlyq mán-jaiyn jan-jaqty zerttep, zań aiasynda ádil sheshim shyǵarady dep senemin», – dedi ol.
Eks-depýtat qazirgi ýaqytta zardap shekken azamattyń otbasy janynda bolyp, qoldan kelgen kómegin kórsetip jatqanyn aitty.
«Sońǵy birneshe kún biz úshin óte aýyr ótti. Jaqyndarymyzben birge zardap shekken azamattyń aman-esen saýyǵyp ketýin tilep júrmiz. Qazir eń bastysy – onyń densaýlyǵy», – dep jazdy Bazarbek.
Sondai-aq ol alǵashqy meditsinalyq kómek kórsetken aýdandyq aýrýhana dárigerlerine, Densaýlyq saqtaý ministrligine jáne óńirlik densaýlyq saqtaý salasynyń mamandaryna rizashylyǵyn bildirdi.
Baqytjan Bazarbek áleýmettik jelilerde oqiǵaǵa qatysty túrli pikirler men boljamdardyń kóbeigenine nazar aýdaryp, jurtshylyqty tergeý aiaqtalmai turyp qorytyndy jasaýǵa asyqpaýǵa shaqyrdy.
«Resmi aqparatqa ǵana súienip, tergeý nátijesin kútken jón», – dedi ol.
Sóz sońynda burynǵy depýtat qiyn sátte qoldaý bildirip jatqan azamattarǵa alǵys aityp, bul jaǵdaidyń ózi men otbasy úshin ońai soqpaǵanyn jetkizdi.
Eske salaiyq, kúni keshe Jambyl oblysynda eks-depýtat Baqytjan Bazarbek jol apatyna túsip, saldarynan bir adam zardap shekkeni týraly aqparat taraǵan bolatyn. Oqiǵa Turar Rysqulov aýdany aýmaǵynda, Lýgovoe aýylynyń mańynda bolǵan.
Aldyn ala málimet boiynsha, joldyń osy bóliginde buǵan deiin ózge mashina maldy qaǵyp ketken. Jolda janýardyń óleksesi qalǵan. Ony alyp tastaý úshin er adam kólik jolyna shyqqan sátte Toyota kóligi qaǵyp ketken. Jelidegi aqparat boiynsha, kólik tizgininde Baqytjan Bazarbek bolǵan.
