Abaidyń Jidebaidaǵy murajai úiiniń alǵashqy jobasyn ózi jasaǵan, dep habarlaidy dalanews.kz 24.kz-ke siltep.
Abai - oishyl, aýdarmashy, sazger, aǵartýshy, qara sózdiń qadirin bilgen aqyn ǵana emes, sáýletshilik qabiletimen de erekshelengen tulǵa. Jidebaidaǵy Abai murajai úiiniń alǵashqy jobasyn Abaidyń ózi jasaǵan.
1895 jyly inisi Ospannan qalǵan eski qystaýdyń ornyna jańa, eńseli úi salǵyzǵan. Ospan 1891 jyly ómirden ótkende, báibishesi Erkejan Abaiǵa ámeńgerlik saltpen turmysqa shyqqan. Tórt jyldan keiin boi kótergen bul shańyraq aqyndy shyǵarmashylyq kemeline jetkizgen ordasy ispetti. Jidebaidaǵy Abai úii - qazir respýblikalyq mańyzy bar tarihi-mádeni eskertkish.
"Jergilikti qurylysshylar qatysyp, Semei qalasynan sheberler shaqyrtylǵan. Shyńǵystaý óńirinde qala mádenietine sai salynǵan tuńǵysh úi osy - Abai úii", - dedi aqyn Nurjan Baitós.
