Almatyda ótken jasandy intellektti damytý keńesinde Qasym-Jomart Toqaev Qazaqstan aldynda naqty tańdaý turǵanyn aitty, dep habarlaidy dalanews.kz.
«Jasandy intellekt jańa jahandyq ekonomikanyń ózegine ainalyp otyr, al úlken derekter – asa mańyzdy resýrs. Osyǵan bailanysty Qazaqstan jasandy intellektti damytýdy strategiialyq basym baǵyt retinde qarastyrady. Bizdiń maqsat – Qazaqstandy zamanaýi tsifrlyq memleketke ainaldyrý. Qajetti institýtsionaldyq infraqurylym quryldy, endi jasandy intellektti ekonomikanyń barlyq salasyna keńinen engizý qajet. Bul rette biz ulttyq múddelerge berik bola otyryp, “tehnologiialyq saqtyq” qaǵidatyn basshylyqqa alamyz», – dedi Qasym-Jomart Toqaev.
Prezidenttiń aitýynsha, tsifrlyq ekonomikanyń JIÓ-ge naqty áserin baǵalaý qajet.
«“Tsifrlyq ekonomika” uǵymy áli tolyq aiqyndalmaǵan, al qoldanystaǵy ádisteme úzik-úzik sipatta. Bizge JIÓ ósiminiń qanshasy naqty sektordyń esebinen, qanshasy innovatsiialar arqyly qamtamasyz etilgenin naqty túsiný kerek. Jalpy kórsetkishter naqty nátijelerdiń joqtyǵyn jasyryp, tiimdilik illiýziiasyn qalyptastyrady. Úkimet Strategiialyq josparlaý jáne reformalar agenttigimen birge tsifrlyq ekonomikanyń JIÓ-ge áserin baǵalaý boiynsha usynystar engizýi tiis», – dedi memleket basshysy.
Toqaev jahandyq deńgeide tehnologiialyq alshaqtyq kúsheiip jatqanyn eskertti.
«Jasandy intellekt kapital men tehnologiiany álemdik kóshbasshylardyń qolyna shoǵyrlandyryp, eńserý qiyn “tehnologiialyq alshaqtyq” qalyptastyryp jatyr. Qazaqstan úshin bul – mańyzdy signal. Biz óz múmkindikterimizdi naqty baǵalap, sheshim qabyldaýymyz kerek. Sarapshylar aitqan “orta tabys tuzaǵynan” shyǵý úshin tsifrlyq ekonomikaǵa kóshý qajet. Biryńǵai memlekettik derekter júiesin qurmaiynsha, jasandy intellekt tiimdi bolmaidy», – dedi ol.
Prezident memlekettik júieni tolyq transformatsiialaýdy talap etti.
«Dástúrli júiede bir suranystan sheshim qabyldaýǵa deiin birneshe kún, tipti apta ketedi. Al idealda bul protsess birneshe sekýndta júzege asýy tiis. Bul kapital ainalymyn kúrt jedeldetedi», – dedi Toqaev.
Ol tsifrlandyrý nátijelerine de toqtaldy.
«KEDEN platformasynyń arqasynda kedendik deklaratsiiany rásimdeý bir minýttan az ýaqyt alady. Smart Cargo júiesi 127 derekkózge qol jetkizýdi qamtamasyz etedi. Salyq júiesinde qujattardy óńdeý ýaqyty bir saǵattan bir minýtqa deiin qysqardy. Smart Data Finance platformasy 78 derekkózden aqparat jinap, júzdegen milliard teńge táýekeldi tólemderdiń aldyn alýǵa múmkindik beredi», – dedi prezident.
Toqaev Qazaqstandy kriptohabqa ainaldyrý mindetin de atap ótti.
«2025 jyly tsifrlyq qarjy aktivteri men kriptovaliýtalardy retteitin ulttyq quqyqtyq baza quryldy. Bul jyljymaityn múlik, altyn, aktsiialar siiaqty aktivterdi tokenizatsiialaýǵa múmkindik beredi. Úkimet pen Ulttyq bank Qazaqstandy kriptohabqa ainaldyrý úshin úilesimdi saiasat júrgizýi tiis. Bul – óte mańyzdy mindet», – dedi ol.
Prezident tsifrlyq infraqurylym men qaýipsizdikke erekshe mán berdi.
«Esepteý qýattary men derekterge baqylaý – memlekettiń táýelsizdigin anyqtaityn faktor. Sondyqtan “Derekter ortalyqtarynyń alqabyn” qurý – basym joba. Sonymen qatar kiberqaýipsizdik barlyq tsifrlyq sheshimderdiń negizine engizilýi tiis», – dedi memleket basshysy.
Sóz sońynda Toqaev naqty eskertý jasady.
«Tańdaý az: ne biz tiimdi tsifrlyq ekonomika quramyz, ne progrestiń shetinde qalamyz. Qarapaiym tilmen aitqanda – “bolý nemese bolmaý”», – dedi prezident.
