Áleýmettik jelide Qazaqstannyń batysy men shyǵysyndaǵy keshki kórinisterdi salystyrǵan videolar tarap jatyr. Aqtaý men Semei, sondai-aq Atyraý men Pavlodarda bir mezette túsirilgen kadrlar el aýmaǵyndaǵy tabiǵi jaryq aiyrmashylyǵyn anyq kórsetedi, dep habarlaidy dalanews.kz.
News.Aktau jáne NewsMangystau paraqshalary 2 qarasha kúni saǵat 17:12-de Aqtaý men Semeide túsirilgen videolardy jariialady. Sol sátte Aqtaýda kún sáýlesi kósheler men ǵimarattardy jaryqtandyryp tur. Al Semeide qas qaraiyp, qala shamdary janyp úlgergen.
"Qazaqstan – bir el, alaida kúnniń batý ýaqyty ártúrli. Eldiń shyǵysynda saǵat 15:00-den keiin-aq qas qaraia bastaidy. Al Aqtaýda bul ýaqytta kún áli jarqyrap turýy múmkin. Ýaqyt beldeýi bir bolǵanymen, eki qaladaǵy kórinis táýliktiń eki bólek mezgilindei áser qaldyrady", – delingen jazbada.
Osyǵan uqsas video Atyraý men Pavlodarda da túsirilgen.
Qumash.kz jariialaǵan kadrlarda saǵat 16:50-de Atyraýda kún áli jaryq bolyp tursa, dál osy ýaqytta Pavlodarda qarańǵy túsip úlgergenin baiqaýǵa bolady.
"Bir ýaqyt beldeýi, bir kún, bir mezgil", – dep jazǵan video avtorlary.
Olar eki qalanyń ózinde osyndai aiyrmashylyq baiqalsa, Qazaqstannyń qiyr shyǵysyndaǵy jaǵdai qandai ekenin suraǵan.
"Nege eshteńege úlgermei júrgenimdi endi túsindim", – dep ázildegen rolik avtorlarynyń biri.
Qazaqstan biryńǵai UTC+5 ýaqyt beldeýimen ómir súrgenimen, qalalardyń geografiialyq orny ártúrli. Sondyqtan shyǵysqa qarai ornalasqan óńirlerde kún erterek batyp, qas qaraisa, batysta keshki jaryq uzaǵyraq saqtalady.
