IIM Uiymdasqan qylmysqa qarsy kúres departamentiniń basqarma bastyǵy Samat Qusetov adam saýdasyna qarsy júrgizilip jatqan jumystyń nátijesin jariialady, dep habarlaidy dalanews.kz 24KZ-ke siltep.
Májbúrli eńbek, jynystyq qanaý jáne aǵzalardy sylyp alý siiaqty adam saýdasyna qatysty 80 qylmys tirkelgen. Quqyq qorǵaý organdary adam saýdasymen ainalysqan eki uiymdasqan qylmystyq toptyń (UQT) zańsyz áreketin toqtatqan.
Onyń biri Almaty men Shymkent qalalarynda áreket etken.
"Qylmystyq top belgili bir turǵylyqty jeri joq adamdardy izdep, jaldaýmen ainalysqan. Olardyń atyna oń kredittik tarih qalyptastyryp, keiin qymbat kólikterdi resimdeý jáne olardy satý maqsatynda paidalanǵan. Búginde uiymdastyrýshylar ustalyp, sotqa deiingi tergeý júrip jatyr", - dedi Samat Qusetov.
Sonymen qatar, jezókshelikpen ainalysýǵa jáne jynystyq sipattaǵy qyzmetter kórsetýge ádeii úi-jai bergenderge qatysty 758 ákimshilik is qozǵalǵan. Salynǵan aiyppuldyń jalpy somasy 213 million teńgeden asty.
