Aldaǵy ýaqytta zeinetkerler men basqa da áleýmettik osal topqa jatatyn azamattarǵa nesie berilmeýi múmkin. Depýtat Erlan Stambekov quzyrly organdarǵa joldaǵan depýtattyq saýalynda zeinetaqy men járdemaqyny nesieleý sharttarynda kirister kózi retinde kórsetýdi, jalpy olardy nesie esebinen alyp tastaýdy usyndy, dep habarlaidy Dalanews.kz.
Erlan Stambekov bankterdiń, mikroqarjy uiymdarynyń jáne kollektorlardyń azamattardyń zeinetaqysy men áleýmettik tólemderinen qaryz aqshasyn óndirip alýyna zańmen tyiym salýdy usyndy. Ol osy másele boiynsha Qarjy naryǵyn retteý jáne damytý agenttigi, Ádilet ministrligi men Eńbek jáne halyqty áleýmettik qorǵaý ministrligine depýtattyq saýal joldady.
Depýtattyń aitýynsha, elimizde shamamen 3,2 million azamat áleýmettik osal topqa jatady. Olar – zeinetkerler, múgedektigi bar jandar, múmkindigi shekteýli bala tárbielep otyrǵan otbasylar men áleýmettik járdemaqy alýshylar.
"Bul adamdar úshin zeinetaqy men járdemaqy – kúnkóristiń jalǵyz kózi. Ol aqshalar qaryzdy qaitarý úshin emes, adamnyń ómir súrýi úshin beriledi. Biraq bankter men mikroqarjy uiymdary osyny eskermesten, zeinetaqyny tabys kózi retinde kórsetip, nesie beredi. Sodan keiin sol zeinetaqydan qaryzdy tikelei óndirip alady. Nátijesinde adamdar kedeishilik deńgeiinen tómen jaǵdaida ómir súrýde", – dedi Erlan Stambekov.
Ol búgingi tańda bankter azamattardyń qarjylyq jaǵdaiyna shynaiy baǵa bermei, tólem qabiletin eskermesten nesie bere beretinin synǵa aldy.
"Zeinetaqy men áleýmettik járdemaqyny tabys retinde kórsetý arqyly nesie rásimdelýde. Tipti jalǵyz kóligi nemese jalǵyz baspanasyn kepilge qoiyp, sońǵy múlkinen aiyrylyp jatqandar kóp. Osy jaǵdailar áleýmettik máseleni odan saiyn kúrdelendirip otyr", – dedi depýtat.
Osyǵan bailanysty Erlan Stambekov áleýmettik osal toptar úshin bankrottyq rásimin jeńildetýdi usyndy. Qazirgi 12 ailyq merzimi ótpegen jaǵdaida da bankrottyqqa júginý múmkindigin qarastyrý qajet.
"Eń bastysy – zeinetaqy men áleýmettik tólemderdi azamattyń tabysy retinde esepteýge zańmen tyiym salyp, nesielik qaryzdy sol qarjydan óndirip alýdy toqtatý qajet", – dep atap ótti Stambekov.
Eger bul usynys zań júzinde bekitilse, bankter men kollektorlar zeinetaqy men áleýmettik tólemderden qaryzdy avtomatty túrde ustap qala almaidy. Bul – áleýmettik kómek alatyn nemese zeinetaqymen kún kóretin jandar úshin úlken jeńildik bolmaq.
