Ekonomist BJZQ-dan qaryz alǵan qurylymdardyń atyn atap, túsin tústep shyqqan eken.
"Jysan bank satyp alǵan ATF banktegi 143 mlrd-tyń shyǵý tegi qyzyq kórinip tur. Munshama aqshany zeinetkerlerge kim jáne qalai qaitarmaq? Máselen, Kaspi banktiń BJZQ-ǵa bereshegi 192 mlrd teńgeni quraidy. Bank belsendi túrde kredit berip, kún-tún demei qareket etip jatyr. Qor aldyndaǵy mindettemesin tolyq óteidi dep oilaimyn.
AsiaCredit bank BJZQ-ǵa 10 mlrd teńge qaryz. Banktiń aktsionerleri qosymsha kapital tabatynyn aityp, ýáde bergen.
Óz basym "Qazaqstan temir jolynyń" Zeinetaqy qorynan alǵan 255 mlrd teńgeni qaitararyna kúmánim kóp. Kompaniia asa tabysty emes, ótken kúnniń qatelikterinen áli aiyǵa almai otyr"
– dep jazdy Rysmambetov Facebook -tegi paraqshasynda.
Sarapshynyń pikirinshe kompaniialar BJZQ-dan alǵan aqshany merziminen buryn qaitarýǵa qulyqsyz.
"Barlyq kompaniialarda bereshekti óteýdiń kestesi bar. Ázir eshkim de erteletip qaryzdy jaýyp tastaýǵa asyǵar emes", – deidi ol.
Rysmambetovtyń aityp ótkenindei BJZQ-dan aqsha alǵan kompaniialardyń tizimi munymen bitpeidi.
Memlekettik ipotekalyq baǵdarlamalardy biriktiretin Qazaqstannyń turaqtandyrý qory Zeinetaqy qoryna 145,7 mlrd teńge qaitarýy kerek.
Nur-Sultanǵa deiin qubyr tartqan "AstanaGaz" kompaniiasy Zeinetaqy qorynan 95 mlrd teńge alǵan. Qaryzdy Nur-Sultan turǵyndary men qurylysqa jaýapty basqa da merdigerler birigip qaitarýǵa mindetti.
"QTJ-niń enshilesi kompaniiasy "Dosjan Temir joly" da BJZQ-ǵa qaryz. 14 mlrd teńge qaitarýy kerek. Alaida munyń bári "QazAgronyń" janynda túkke turmaidy. Siz ben biz bul kompaniiaǵa 675 mlrd teńgeni salyp jiberdik. Al aýyldyń jaǵdaiy anaý. Aýylsharýashylyǵy salasy azyp-tozyp tur. "QazAgro" qaryzdy qaitarady degen úmittemin", – deidi sarapshy.
