Birinshi mamyrdan bastap erikti zeınetaqy jarnalaryn merziminen buryn alatyndar tizimi keńeıdi. Bul týraly Biryńǵaı jınaqtaýshy zeınetaqy qory habarlady.
Erikti zeınetaqy jarnasy – salymshylardyń óz bastamasymen zeınetaqy qoryndaǵy shotyna aýdaratyn aqshasy.
Zeınetaqymen qamsyzdandyrý týraly zańǵa sáıkes, erikti zeınetaqy jarnasyn merziminen buryn alýǵa myna sanattaǵy adamdarǵa ruqsat etiledi:
- elý jasqa tolǵan;
- múgedekterge;
- Qazaqstan sheginen tysqary jerge turaqty turýǵa ketetin nemese ketken sheteldikter men azamattyǵy joq adamdar (ketý nıetin nemese faktisin rastaıtyn qujattardy usynǵan jaǵdaıda);
- BJZQ-da jáne (nemese) erikti jınaqtaýshy zeınetaqy qorynda erikti zeınetaqy jarnalary men olarǵa eseptelgen ınvestısıalyq kiris somasy sheginde keminde 5 jyl zeınetaqy jınaǵy bar adamdar.
Sońǵy sanat tizimge bıyl mamyrda ǵana endi. Endi zeınetaqy qoryna erikti zeınetaqy jarnalaryn keminde bes jyl aýdarǵan azamattar shottaǵy aqshasyn merziminen buryn alýǵa quqyly.
Máselen, eger salymshy EZJ-ny 20 nemese 30 jastan bastap aýdarsa, tıisinshe 25 nemese 35 jasqa tolǵanda óziniń alǵashqy tólemin alady.
Aıta ketsek, 2021 jyldyń 1 mamyrynan erikti zeınetaqy jarnalaryn esepke alý úshin shottar avtomatty túrde ashylady. Jeke zeınetaqy shottaryn ashýǵa BJZQ-ǵa túsken alǵashqy erikti zeınetaqy jarnasy negiz bolady. Iaǵnı salymshyǵa keńsege barýdyń qajeti joq.
EZJ-ny jeke tulǵa ózi úshin, jeke nemese zańdy tulǵalar basqa bireý úshin aýdara alady. Bul rette jarna mólsheri men merzimdiligin salymshy ózi aıqyndaıdy.
Erikti zeınetaqy jarnalaryn ekinshi deńgeıli bankter nemese Qazposhta arqyly aýdarýǵa bolady. Keıbir bankterde zeınetaqy jarnasyn onlaın (mobıldi qosymsha nemese ózine-ózi qyzmet kórsetý termınaldary) aýdarý múmkindigi qarastyrylǵan.
Budan bólek, BJZQ aqparatynsha, óz paıdasyna erikti zeınetaqy jarnasyn turaqty aýdaryp turý úshin jumys berýshiniń atyna ótinish jazýǵa da bolady. Sonyń negizinde jumys berýshi jarnany ótinish ıesiniń ne úshinshi tulǵanyń shotyna turaqty túrde aýdaryp otyrady.
Derekkóz: sputnik.kz
