Búgin Ulttyq Bank Biryńǵai jinaqtaýshy zeinetaqy qorynda jinaqtalǵan 173 milliard teńgege úkimettik «Báiterek» holdingi men «Samuryq-Qazyna» qorynyń 15 jyldyń obligatsiialaryn birja arqyly satyp alatyn boldy, – dep habarlaidy Dalanews.kz.
Negizi eki alpaýyt 190 milliard teńgege obligatsiia shyǵarmaqshy. Biraq jeke investorlar da qyzyǵýshylyq tanytyp, olar 17 milliard teńgeniń obligatsiiasyn aldy. Qalǵany BJZQ-ǵa buiyrdy.
Bul rette, zeinetaqy aqshasynyń memleketke de, úkimetke de emes, halyqqa tiesili ekenin eskersek, eki úlken suraq týyndaidy.
Birinshisi, bul mámile halyq úshin tiimdi me? Ekinshisi – bul mámile halyq úshin qaýipsiz be, iaǵni aqshamyzdy joǵaltyp almaimyz ba?
Bul – halyq úshin tiimdi me?
Qazir bazalyq stavkanyń 15,25%, TONIA indikatorynyń 14,96, al infliatsiianyń jyldyq máni 9,8% ekenin eskersek, osy obligatsiialardyń 13 paiyzdy quraityn jyldyq kiristiligi naryqtyq jáne tipti 1-2 jyldan keiin óte tiimdi bolyp jumys istei bastaitynyn ańǵarýǵa bolady. Áitpese, jeke investorlar bul obligatsiialarǵa kirmes edi.
Ulttyq Banktiń strategiialyq maqsaty infliatsiiany 5 paiyzǵa deiin túsirý. Jáne infliatsiia túsip kele jatyr.
Artynsha biyl jáne kelesi jyly bazalyq stavka da tómendeidi dep kútilýde. Mysaly, kelesi jyly jańa korporativti obligatsiialardyń jyldyń kiristiligi 11-12 paiyzdan artpaýy múmkin.
Qarjy ministrligi jariialaityn bolashaq tabystylyq qisyǵyna (krivaia dohodnosti) qarap, osy boljamnyń rastyǵyn tekserýge bolady.
Sol kezde 15 jyl boiy 13% kiristilik berip turatyn «Báiterek» pen «Samuryq-Qazyna» obligatsiialary bizdiń zeinetaqy qarjymyzdy kóbeitýge jaqsy yqpal etpek.
173 milliard teńgeden biz jyl saiyn 22,49 milliard teńge kiristilik alamyz dep sanasaq, 15 jylda ol 337,35 milliard teńge bolady. Sonda 173 milliard teńge 510 milliard teńge bolyp qaitpaq.
Joǵary infliatsiia fazasynan óttik dep sanalǵandyqtan, tipti qazirgi sátpen modeldesek, 9,8% bolatyn infliatsiia mániniń ústinen 3,2% kiristilik alyp otyramyz. Sondyqtan, bul halyq úshin tiimdi.
Bul – halyq úshin qaýipsiz be?
Iá, Báiterek pen Samuryq-Qazyna jeke kompaniialar emes. Olardyń barlyq mindettemeleri, qaryzdary memleket tarapynan kepildendiriledi. Sondyqtan Qazaqstannyń sýverendi reitingi (S&P: BBB-/A-3, Fitch: BBB turaqty) qandai, eki holdingte de sondai reiting bolady.
Qarapaiym tilmen aitsaq, olar 100 paiyz senimdi, alǵan aqshasyn ne bolsa da qaitara alatyn alpaýyt uiymdar. Sondyqtan bul mámile halyq úshin qaýipsiz.
Bizdiń zeinetaqy qorynda 18,7 trillion teńge aýyr júk bolyp jatyr. Jata bersin deiin desek, ony infliatsiia jep qoiady.
Tabystylyq qýyp startaptardyń aktsiialaryn, nemese kripotovaliýta satyp alaiyq desek, aqyr aiaǵynda aqshamyzdy joǵaltýymyz múmkin.
Halyqtyń aqshasymen olai oinaýǵa bolmaidy. Sol úshin Ulttyq Bank barynsha saqtyqpen, 100 paiyz qaitatynyna senimdi, sonymen birge tabystylyǵy infliatsiiadan joǵary bolatyn qundy qaǵazdardy izdep, solarǵa investitsiia jasaidy.
Úkimet ekonomikanyń naqty sektoryna zeinetaqy qorynan 1,5 trillion teńge tartpaq. Oǵan jańa TETs-ter salady, vagon alady, infraqurylymdy jańartady.
Esesine obligatsiialarynda joǵary tabystylyq pen tolyq garantiia berip otyr. BJZQ-ny basqaryp otyrǵan qarjyger-investor retinde Ulttyq Bank úshin bul óte tiimdi usynys.
