Jetisý oblysy qurylǵannan beri óńirdegi respýblikalyq mańyzy bar avtomobil joldary 100% jóndeýden ótti. Sonymen qatar qazirgi ýaqytta oblystyq mańyzy bar 150 shaqyrym jolǵa jáne oblystyń 38 eldi mekenindegi 230 shaqyrym kóshege jóndeý jumystary júrgizilýde, dep habarlaidy dalanews.kz.
Kólik infraqurylymyn jańǵyrtý aiasynda jalpy uzyndyǵy 30 shaqyrymdy quraityn «Jansúgirov – Aqsý» oblystyq mańyzy bar avtomobil jolynda ortasha jóndeý jumystary jalǵasýda. Atalǵan jol ýchaskesine sońǵy 30 jyl boiy kúrdeli jóndeý, qurylys nemese qaita jańǵyrtý jumystary múlde júrgizilmegen.
Oblystyq jolaýshylar kóligi jáne avtomobil joldary basqarmasynyń málimetinshe, bul joldaǵy ortasha jóndeý jumystary 2024 jyly bastalǵan. Jobany júzege asyrýǵa qajetti qarajat oblystyq biýdjetten bólindi.
– Eń aldymen sý burý máselesi sheshildi. Josparlanǵan 13 sý ótkizý qubyrynyń barlyǵy búgingi kúnge deiin tolyq ornatylyp, paidalanýǵa daiyn. Qazirgi ýaqytta jolǵa asfalt tóseý jumystary júrgizilýde. Búginde trassanyń 11 shaqyrymyna tolyqtai asfalt tóseldi. Bul ýchaskede jol jiegin nyǵaitý jumystary atqarylyp jatyr. Odan keiin mamandar jańa jol belgilerin ornatyp, jol tańbalaryn syzýǵa kirisedi. Qalǵan 20 shaqyrym joldy biylǵy jyldyń qazan aiynyń sońyna deiin tolyq asfalttaý josparlanǵan. Al qarasha aiynda nysan barlyq qajetti infraqurylymymen birge paidalanýǵa beriledi. Sonymen qatar biyl «Aqsý – Qarakóz» avtomobil jolyna jóndeý jumystary bastaldy. Sondai-aq Aqsý aýylynan Oitoǵan aýylyna deiingi 20 shaqyrym jolǵa da jóndeý júrgizilýde. Bul nysandar kelesi jyly paidalanýǵa beriledi. Jalpy, biyl Aqsý aýdanynda shamamen 40 shaqyrym jol ýchaskesi jóndeýmen qamtyldy, – dedi oblystyq jolaýshylar kóligi jáne avtomobil joldary basqarmasy basshysynyń orynbasary Aidos Dosjanov.
Atap ótsek, «Jansúgirov – Aqsý» oblystyq mańyzy bar avtomobil jolyn jańartý – óńirdiń kólik infraqurylymyn júieli túrde damytý jumystarynyń bir bóligi ǵana.
Sońǵy jyldary óńirdegi respýblikalyq mańyzy bar avtomobil joldarynyń 100 paiyzy tolyq jóndelip, jańǵyrtyldy. Atap aitqanda, «Taldyqorǵan – Úsharal – Dostyq» jáne «Saryózek – Qorǵas» baǵyttaryndaǵy joldar jańartyldy.
«Almaty – Taldyqorǵan» avtojolynyń uzyndyǵy 21 shaqyrym bolatyn ýchaskesinde kúrdeli jóndeý júrgizilýde. Joba biylǵy jyldyń sońyna deiin tolyq aiaqtalady.
Almaty oblysynyń shekarasynan Taldyqorǵan qalasyna deiingi, onyń ishinde qalanyń ainalma jolyn qamtityn 158 shaqyrym avtojol 2027 jyldyń sońyna deiin tolyq qaita jańǵyrtylady.
Al uzyndyǵy 40 shaqyrym bolatyn «Taldyqorǵan – Úshtóbe» avtojolynyń ýchaskesinde ortasha jóndeý jumystary júrgizilip jatyr. Bul jumystar biylǵy qyrkúiek aiynda aiaqtalady.
Osylaisha, biylǵy jyldyń qorytyndysy boiynsha oblystyq mańyzy bar avtomobil joldarynyń jaqsy jáne qanaǵattanarlyq jaǵdaidaǵy úlesi 96 paiyzǵa jetip, bul kórsetkish eldegi eń joǵary deńgeilerdiń biri bolmaq.
