Jetisý oblysynda tuńǵysh ret jańa, zamanaýi, eki qabatty kitaphana ǵimaraty arnaiy salynyp, qoldanysqa berildi. Joba Memleket basshysynyń tapsyrmasyna sáikes iske asyryldy. Kerbulaq aýdanynyń Saryózek aýylynda ornalasqan kitaphananyń ashylýyna oblys ákimi Beibit Isabaev qatysty, dep habarlaidy dalanews.kz.
Aýdan turǵyndaryn jańa nysannyń ashylýymen quttyqtaǵan oblys basshysy aýyldyq eldi mekende zamanaýi jańa kitaphananyń ashylýy Jetisý óńiriniń rýhani ómirindegi aitýly jańalyq ekenin atap ótti.
- Bul – kitap oqý mádenietin damytý jáne zamanaýi kitaphana keńistikterin qalyptastyrý týraly Memleket basshysynyń tapsyrmasyn óńirde iske asyrýdyń alǵashqy bastamasy. Jańa kitaphanada kitap oqýǵa ǵana emes, tsifrlyq resýrstardy paidalanýǵa, jan-jaqty izdenýge, túrli mádeni jáne qoǵamdyq is-sharalar ótkizýge barlyq jaǵdai jasalǵan. Kitaphanaǵa salynǵan investitsiia – eń aldymen adam kapitalyna, ulttyń intellektýaldyq áleýetine jasalǵan investitsiia. Bul rette osy kieli ordadan bilimdi, sanaly, tárbieli, kitapsúier urpaqtyń qalyptasyp shyǵatynyna senimdimiz. Jańa nysan osyndai igi maqsattarǵa qyzmet etip, óńirdiń rýhani shamshyraǵyna ainalsyn! – dedi B. Isabaev.
Munan soń jinalǵan kópshilik kitaphananyń ishin aralap kórdi. Sonyń ishinde májilis zalyn, oqý zalyn jáne balalar bólimin aralap kórdi.
Kitaphana direktory Gúlmira Ahanqyzynyń aitýynsha, jańa kitaphananyń kitap qory 53 myńnan asady. Ǵimarattyń basty ereksheligi - munda birneshe oqyrman zalynyń bolýy, atap aitqanda mektep jasyna deiingi, mektep jasyndaǵy balalarǵa, eresekterge arnalǵan arnaiy oqyrman zaldary qarastyrylǵan. Sonymen qatar mediatekasy bar aqparattyq-anyqtamalyq zal, kóbeitý zerthanasy, aýqymdy kitap qoimasy ornalasqan. Qazirgi tańda kitaphana oqyrmandarynyń sany shamamen 5570 adam.
Jańa kitaphana ǵimaratynyń aýmaǵy 1620 sharshy metr. Kitaphanada oqyrmandarǵa qolaily jaǵdai jasalyp, zamanaýi talaptarǵa sai jabdyqtalǵan.
Birinshi qabatta kitaphananyń negizgi qyzmettik jáne oqý zaldary ornalasqan. Munda kitap qoryn zamanaýi talaptarǵa sai saqtaýǵa jáne oqyrmandarǵa elektrondy formatta usynýǵa múmkindik beretin skanerleý jáne tsifrlandyrý kabineti bar. Sondai-aq kompiýtermen jáne internetpen jabdyqtalǵan mýltimedia zaly jumys isteidi. E-gov portaly arqyly ózine-ózi qyzmet kórsetý buryshy qarastyrylǵan.
- Biregei zaldardyń biri – 30 oryndyq ólketaný zaly. Munda ólkeniń tarihy men mádenieti, Kerbulaq aýdanynan shyqqan belgili tulǵalar týraly keń kólemde aqparat beretin kitap materialdary qoiylǵan. Sondai-aq bul zalda aýdannyń tarihi-mádeni murasyn saqtaýda mańyzdy orny bar sirek kezdesetin kitaptar toptamasy saqtalǵan. Munyń bári aýdan turǵyndary men qonaqtarynyń igligi úshin usynylyp otyr, – dedi G. Ahanqyzy.
Kitaphananyń ekinshi qabatynda kitaphananyń balalar bólimi ornalasqan. Munda internetke qosylǵan, kompiýtermen jabdyqtalǵan IT-zal bar. Sondai-aq 56 oryndyq oqý zalynda balalardyń jas erekshelikterine sai túrli taqyryptyq kitap kórmeleri uiymdastyrylǵan. Bul olardyń kitap oqýǵa degen qyzyǵýshylyǵyn arttyra túsedi. Úiirmeler ótkizý úshin «Balaýsa» oqý keńistigi jáne balalardyń paidaly ýaqytyn uiymdastyrýǵa arnalǵan kovorking ortalyǵy qurylǵan. Sonymen qatar ekinshi qabatta túrli mádeni is-sharalardy ótkizýge jaǵdai jasalǵan akt zaly ornalasqan.
Balalar bóliminiń kitap qorymen tanysqan oblys basshysy ony aldaǵy ýaqytta jańa qundylyqtarǵa negizdelgen jańa ádebietpen tolyqtyrý kerek ekenin aitty. Sol siiaqty «Balalardyń IT zalyna» internetti paidalanyp, balalarǵa álemniń kez kelgen elindegi kitaphananyń oqyrmany bola alatyndai múmkindikti úiretetin mamandardy arnaiy tartýdy tapsyrdy.
Mektep oqýshylary kitaphananyń oqý zalynda kitap, bilim týraly qazaq qalamgerleriniń óleńderin oqydy.
Eske salsaq, buǵan deiin aýdandyq kitaphana men balalar kitaphanasy aýyldyq ákimdik ǵimaratynda jáne Ábiken Sarybaev atyndaǵy aýdandyq mádeniet úiiniń ishinde otyrǵan bolǵan.
Jalpy, óńirde 150 kitaphana bar. Olarda 128 klýb pen úiirmeler, 29 kovorking ortalyǵy jumys isteidi. Oblys qurylǵaly beri kitaphanalardaǵy kitap qorynyń sany 2,8 millionnan asty.
