Búgin Jetisý oblysynda «BIKEN FEST» IV Halyqaralyq teatr festivali bastaldy. Festivalǵa biyl Túrkiia, Grýziia, Ózbekstan memleketterinen jáne el aimaqtarynan 8 teatr qatysyp otyr, dep habarlaidy dalanews.kz.
Aldymen Taldyqorǵandaǵy Biken Rimova atyndaǵy akademiialyq drama teatry ǵimaratynyń aldynda festivalǵa qatysýshy teatrlardyń sherýi uiymdastyryldy. Munan soń teatr ǵimaratynyń zalynda festival kúndeliginen estelik beinejazba kórsetildi.
Saltanatty sharany quttyqtaý sózimen ashqan oblys ákiminiń orynbasary Dias Esdáýletov dástúrli teatr merekesiniń Jetisý óńirinde osymen tórtinshi jyl qatarynan ótkizilip otyrǵanyn aitty.
- Qadirli qonaqtar men qatysýshylar, jer jánnaty Jetisýǵa qosh keldińizder! «BIKEN FEST» festivali alǵash ret 2023 jyly Qazaqstannyń Halyq ártisi Biken Rimovanyń 100 jyldyq mereitoiyna orai uiymdastyrylyp, Jetisý óńiriniń mádeni imidjin nyǵaitatyn mańyzdy jobaǵa ainaldy. Osy 4 jyl ishinde bul is-sharaǵa 6 memleketten jáne elimizdiń óńirlerinen barlyǵy 36 teatr qatysty. Biyl da osy festivalǵa arnaiy shetelden jáne elimizden 8 teatr kelip otyr. Barsha teatr ujymdaryn oblys ákiminiń atynan quttyqtap, shyǵarmashylyq tabys tileimin! Ónerimiz órkendei bersin! – dedi ol.
Munan soń kórermenderge D.Raqyshev atyndaǵy oblystyq filarmoniianyń Muqan Tólebaev atyndaǵy halyq aspaptar orkestriniń kontserti usynyldy.
Teatr festivali týraly qazylar alqasynyń tóraǵasy Qazaqstannyń eńbek sińirgen qairatkeri, Muhtar Áýezov atyndaǵy Qazaq ulttyq drama teatrynyń direktory Erkin Jýasbek pikirin bildirdi:
- Elimizde ótetin osyndai onshaqty teatr festivali bar. Olardyń bári de qazaq sahna óneriniń ósip-jetilýine septigin tigizip jatyr. Sonyń biri úzilmei jyl saiyn Jetisý jerinde ótkizilip otyrǵany bizdi qýantady. Bul tek kásibi sahnagerlerge ǵana emes, kórermender úshin de qyzyq shara dep oilaimyn. Sebebi kez kelgen kórermenniń Túrkiiaǵa, Grýziiaǵa baryp, spektakl kórip qaitýǵa múmkindigi bola bermeidi. Oǵan qosa ulttyq ónerdi damytý degen bir sheńberde qalý emes, ol mádeni almasýlar, rýhani bailanystar arqyly tolyǵa túsedi, tájiribe almasý arqyly ósip-jetilip otyrady, - dedi ol.
Sol siiaqty Grýziianyń Batými qalasynan kelgen teatr ujymynyń ókilderi de oi qosty.
- Biz Qazaqstanǵa tuńǵysh ret kelip otyrmyz. Erteń «Djazda tek qana qyzdar» atty mýzykalyq qoilymyn sahnalaimyz. Jalpy teatr ujymynan 40-tan astam, sonyń ishinde 19 akter keldik. Bir atap óterligi, erteń 26 mamyr Grýziianyń táýelsizdik kúni merekesi. Soǵan orai erteń jetisýlyq kórermenge óner kórsetemiz, iaǵni erteń biz úshin merekelik qýanysh eselene túsedi, - dedi I. Chavchavadze atyndaǵy Batými memlekettik drama teatrynyń akteri Levan Tedoradze.
Atap ótsek, «BIKEN FEST» IV Halyqaralyq teatr festivali 29 mamyrǵa deiin jalǵasady. Bes kún boiy teatr sahnasynda Túrkiianyń Painted bird teatry, Ózbekstannyń Qashqadariia oblystyq mýzykalyq drama teatry, Grýziianyń I. Chavchavadze atyndaǵy Batými memlekettik drama teatry, Memlekettik akademiialyq qýyrshaq teatry, Jastar teatry, N. Jantórin atyndaǵy Mańǵystaý oblystyq mýzykalyq drama teatry, Túrkistan mýzykalyq drama teatry, Shyǵys Qazaqstan oblystyq drama jáne operetta teatry óner kórsetedi.
