Memleket basshysy «QazMunaiGaz» UK AQ basqarma tóraǵasy Ashat Hasenovti qabyldady, dep habarlaidy Dalanews.kz.
Qasym-Jomart Toqaevqa ulttyq kompaniianyń 2025 jyly atqarǵan jumysy men biylǵy mindetteri jóninde málimet berildi.
Ashat Hasenovtiń aitýynsha, byltyr Qytaidyń CNOOC jáne Sinopec kompaniialarymen Atyraý oblysyndaǵy Jylyoi jáne Batys Qazaqstan oblysyndaǵy Berezovskii jobalary boiynsha jer qoinaýyn paidalaný kelisimsharttary jasaldy. Turkish Petroleum Corporation, BP, Horvat kómirsýtegi agenttigi sekildi iri halyqaralyq kásiporyndar elimizdegi perspektivti ýchaskelerdi zerttep jatyr.
Prezidentke «QazMunaiGaz» kompaniiasy buǵan deiin keń kólemde zerttelmegen jáne jiti kóńil bólinbegen aýmaqtarda geologiialyq barlaý júrgizýge erekshe den qoiǵany jóninde baiandaldy. 2025 jyly 8 izdeý uńǵymasyn burǵylaý aiaqtaldy, al 2029 jylǵa deiin taǵy 24 izdeý uńǵymasyn burǵylaý josparlanǵan. Jalpy investitsiia kólemi 900 million dollardan asady.
Memleket basshysyna usynylǵan esepke sáikes 2025 jyldyń qorytyndysy boiynsha munai men kondensat óndirý kólemi 26,2 million tonnaǵa jetti. Bul 2024 jylmen salystyrǵanda 10 paiyzǵa joǵary. Budan bólek, kógildir otyn óndirý kólemin jylyna qosymsha 2,3 milliard tekshe metrge ulǵaitý úshin Batys Prorva, Ortalyq Óriktaý jáne Rojkov ken oryndarynda jumys júrgizilip jatyr.
Byltyr «QazMunaiGazdyń» úsh munai óńdeý zaýytynda 17,5 million tonna shikizat óńdeldi. Jeńil munai ónimderin shyǵarý kólemi - 13,6 million tonna (2024 jylǵy kórsetkishten 1,2 million tonnaǵa artyq).
Sondai-aq, Qasym-Jomart Toqaev munai-gaz himiiasy men gaz óńdeý salasyndaǵy jalpy quny 15 milliard dollardan asatyn iri investitsiialyq jobalardy iske asyrý barysymen tanysty. Mańǵystaý oblysynda qýaty táýligine 50 myń tekshe metr bolatyn «Kendirli» teńiz sýyn tushytý zaýyty paidalanýǵa berildi.
Kezdesý sońynda Memleket basshysy geologiialyq barlaý jumystaryn jandandyrýǵa jáne iri investitsiialyq jobalardy ýaqtyly iske asyrýǵa qatysty mindet júktedi.
