Resei prezidentiniń baspasóz hatshysy Dmitrii Peskov RBK radiosyna bergen suhbatynda Vladimir Zelenskiidiń Vladimir Pýtinmen beitarap alańda, mysaly Qazaqstanda, kezdesý ótkizýge daiyn ekendigi týraly málimdemesine pikir bildirdi, dep habarlaidy Dalanews.kz.
“Ýkraindar kóptegen usynys jasap, birneshe eldiń atyn atady. Alaida áýelde Qazaqstanǵa emes, biz úshin múlde qolaisyz memleketterge basymdyq berdi. Áli kúnge deiin Shveitsariia nemese Avstriiany beitarap dep sanaidy. Alaida olar biz úshin beitarap emes. Bul aiqyn nárse, sony eskerý kerek”, – dedi ol.
Sonymen qatar ol Pýtinniń buǵan deiin Zelenskiige Máskeýde kezdesýdi usynyp, qaýipsizdikke kepildik bergenin eske saldy. Alaida Kiev bul usynysty birden qabyldamai, “shynaiy emes” dep baǵalaǵan.
“Nege biz mundai kózqarasty ózgermeitin aksioma retinde qabyldaýymyz kerek? Biz dialogqa ashyq bolsaq, nege kelmeske?” – dedi Peskov.
Onyń aitýynsha, kelissózderdiń qaida ótetini Máskeýde me, Qazaqstanda ma, álde Jenevada ma – basty másele emes.
“Pýtin: “Kezdeskiń kelse, erteń-aq kezdesemiz” deidi. Al Kiev bolsa túrli sebep aityp, keiinge shegere beredi. Pýtin kelissózder tobynyń jetekshisi Medinskii arqyly “jumys tobyn quryp, resmi túrde kelissóz bastaiyq” degen. Biraq Ýkraina buǵan jaýap qatpai, eshqandai top qurǵan joq, naqty áreketke de barǵan joq”, – dedi Peskov.
Kiev jaǵy da kezdesý ornyn basty másele emes dep sanaitynyn málimdedi. Olar úshin kelissózderdiń mazmuny mańyzdyraq. Zelenskiidiń aitýynsha, áńgime tek Ýkraina aýmaqtyq tutastyǵy qalpyna keltirilgen jaǵdaida ǵana múmkin, ári eshqandai “territoriiamen saýda” bolmaidy. Buǵan deiin Zelenskii Pýtinniń Máskeýde kezdesý ótkizý usynysyn “shynaiy emes” dep atap, Kremldiń “kelissóz júrgizýdi emes, soǵysýdy qalaitynyn” aitqan edi.
Aita keteiik, buǵan deiin Ýkraina basshysy Vladimir Zelenskii Resei prezidenti Vladimir Pýtinmen Qazaqstanda kezdesýge ázir ekenin málimdegen edi.
"Onyń (Pýtinniń – Dalanews) tańdaýy bar. Tramptyń da komandasy, meniń de komandam, eýropalyq kóshbasshylar, sonyń ishinde Makron jáne basqalary, sondai-aq Túrkiia prezidenti Erdoǵan da - barlyǵymyz kezdesýdi Túrkiiada, Saýd Arabiiasynda, Katarda nemese beitarap Eýropada, mysaly, Avstriiada, Shveitsariiada ótkizýdi usyndyq. Sondyqtan biz: “Qalasańyzdar, Qazaqstan siiaqty jerde de kezdesýge bolady” dep aittyq", – dedi Zelenskii sársenbi kúni Fox News arnasyna bergen suhbatynda.
Ol dál qazir Resei kóshbasshysymen kezdesýge daiyn ekenin atap ótti.
"Men ony Kievke shaqyrǵan joqpyn. "Eger siz menimen kezdeskińiz kelmese, árine, óz tarapyńyzdan meni Máskeýge shaqyrasyz. Bul tek kezdesýdi keiinge qaldyrý úshin jasalatyn áreket qana” dedim. Bul – men ony Kievke shaqyrǵanymmen birdei nárse", – dep túsindirdi Zelenskii.
Eske salaiyq, Ýkraina prezidenti Vladimir Zelenskii Resei prezidenti Vladimir Pýtinniń Máskeýde beibit kelissózder júrgizý týraly usynysyn qabyldamai, ony Kievke shaqyrǵan edi. Bul týraly ol ABC News arnasyna bergen suhbatynda aitty.
"Ol Kievke kele alady. Eger adam soǵys kezinde kezdeskisi kelmese, ol árine, men úshin de, basqalar úshin de qabyldai almaityn nárseni usynady. Bul - men oǵan Kievke kelýin usynǵanymmen birdei", – dedi Ýkraina prezidenti.
Zelenskiidiń pikirinshe, Pýtin mundai usynysty kezdesý ýaqytyn keiinge shegerý úshin jasaǵan.
Ýkraina basshysy, sonymen birge, eli kún saiyn zymyran shabýylyna jáne túrli soqqylarǵa ushyrap jatqan kezde Máskeýge bara almaitynyn aityp, Pýtinniń muny "jaqsy túsinetinin" jetkizdi.
Pýtin 3 qyrkúiekte Qytaiǵa jasaǵan saparynan keiin Zelenskiimen kelissózderdi Resei astanasynda ótkizýge daiyn ekenin málimdegen edi. Eki kúnnen soń Shyǵys ekonomikalyq forýmynda sóilegen sózinde Resei prezidenti Máskeýdiń "joǵarǵy deńgeidegi kelissózder úshin eń qolaily oryn" ekenin taǵy da atap ótti.
