رەسەي پرەزيدەنتىنىڭ باسپا ءسوز حاتشىسى دميتريي پەسكوۆ ربك راديوسىنا بەرگەن سۇحباتىندا ۆلاديمير زەلەنسكييدىڭ ۆلاديمير پۋتينمەن بەيتاراپ الاڭدا، مىسالى قازاقستاندا، كەزدەسۋ وتكىزۋگە دايىن ەكەندىگى تۋرالى مالىمدەمەسىنە پىكىر ءبىلدىردى، دەپ حابارلايدى Dalanews.kz.
“ۋكرايندار كوپتەگەن ۇسىنىس جاساپ، بىرنەشە ەلدىڭ اتىن اتادى. الايدا اۋەلدە قازاقستانعا ەمەس، ءبىز ءۇشىن مۇلدە قولايسىز مەملەكەتتەرگە باسىمدىق بەردى. ءالى كۇنگە دەيىن شۆەيساريا نەمەسە اۆستريانى بەيتاراپ دەپ سانايدى. الايدا ولار ءبىز ءۇشىن بەيتاراپ ەمەس. بۇل ايقىن نارسە، سونى ەسكەرۋ كەرەك”، – دەدى ول.
سونىمەن قاتار ول ءپۋتيننىڭ بۇعان دەيىن زەلەنسكييگە ماسكەۋدە كەزدەسۋدى ۇسىنىپ، قاۋىپسىزدىككە كەپىلدىك بەرگەنىن ەسكە سالدى. الايدا كييەۆ بۇل ۇسىنىستى بىردەن قابىلداماي، “شىنايى ەمەس” دەپ باعالاعان.
“نەگە ءبىز مۇنداي كوزقاراستى وزگەرمەيتىن اكسيوما رەتىندە قابىلداۋىمىز كەرەك؟ ءبىز ديالوگقا اشىق بولساق، نەگە كەلمەسكە؟” – دەدى پەسكوۆ.
ونىڭ ايتۋىنشا، كەلىسسوزدەردىڭ قايدا وتەتىنى ماسكەۋدە مە، قازاقستاندا ما، الدە جەنيەۆادا ما – باستى ماسەلە ەمەس.
“پۋتين: “كەزدەسكىڭ كەلسە، ەرتەڭ-اق كەزدەسەمىز” دەيدى. ال كييەۆ بولسا ءتۇرلى سەبەپ ايتىپ، كەيىنگە شەگەرە بەرەدى. پۋتين كەلىسسوزدەر توبىنىڭ جەتەكشىسى مەدينسكيي ارقىلى “جۇمىس توبىن قۇرىپ، رەسمي تۇردە كەلىسسوز باستايىق” دەگەن. ءبىراق ۋكراينا بۇعان جاۋاپ قاتپاي، ەشقانداي توپ قۇرعان جوق، ناقتى ارەكەتكە دە بارعان جوق”، – دەدى پەسكوۆ.
كييەۆ جاعى دا كەزدەسۋ ورنىن باستى ماسەلە ەمەس دەپ سانايتىنىن مالىمدەدى. ولار ءۇشىن كەلىسسوزدەردىڭ مازمۇنى ماڭىزدىراق. زەلەنسكييدىڭ ايتۋىنشا، اڭگىمە تەك ۋكراينا اۋماقتىق تۇتاستىعى قالپىنا كەلتىرىلگەن جاعدايدا عانا مۇمكىن، ءارى ەشقانداي “تەرريتوريامەن ساۋدا” بولمايدى. بۇعان دەيىن زەلەنسكيي ءپۋتيننىڭ ماسكەۋدە كەزدەسۋ وتكىزۋ ۇسىنىسىن “شىنايى ەمەس” دەپ اتاپ، كرەملدىڭ “كەلىسسوز جۇرگىزۋدى ەمەس، سوعىسۋدى قالايتىنىن” ايتقان ەدى.
ايتا كەتەيىك، بۇعان دەيىن ۋكراينا باسشىسى ۆلاديمير زەلەنسكيي رەسەي پرەزيدەنتى ۆلاديمير پۋتينمەن قازاقستاندا كەزدەسۋگە ءازىر ەكەنىن مالىمدەگەن ەدى.
"ونىڭ (ءپۋتيننىڭ – Dalanews) تاڭداۋى بار. ترامپتىڭ دا كومانداسى، مەنىڭ دە كوماندام، ەۋروپالىق كوشباسشىلار، سونىڭ ىشىندە ماكرون جانە باسقالارى، سونداي-اق تۇركيا پرەزيدەنتى ەردوعان دا - بارلىعىمىز كەزدەسۋدى تۇركيادا، ساۋد ارابياسىندا، كاتاردا نەمەسە بەيتاراپ ەۋروپادا، مىسالى، اۆستريادا، شۆەيساريادا وتكىزۋدى ۇسىندىق. سوندىقتان ءبىز: “قالاساڭىزدار، قازاقستان سياقتى جەردە دە كەزدەسۋگە بولادى” دەپ ايتتىق"، – دەدى زەلەنسكيي سارسەنبى كۇنى Fox News ارناسىنا بەرگەن سۇحباتىندا.
ول ءدال ءقازىر رەسەي كوشباسشىسىمەن كەزدەسۋگە دايىن ەكەنىن اتاپ ءوتتى.
"مەن ونى كييەۆكە شاقىرعان جوقپىن. "ەگەر ءسىز مەنىمەن كەزدەسكىڭىز كەلمەسە، ارينە، ءوز تاراپىڭىزدان مەنى ماسكەۋگە شاقىراسىز. بۇل تەك كەزدەسۋدى كەيىنگە قالدىرۋ ءۇشىن جاسالاتىن ارەكەت قانا” دەدىم. بۇل – مەن ونى كييەۆكە شاقىرعانىممەن بىردەي نارسە"، – دەپ ءتۇسىندىردى زەلەنسكيي.
ەسكە سالايىق، ۋكراينا پرەزيدەنتى ۆلاديمير زەلەنسكيي رەسەي پرەزيدەنتى ۆلاديمير ءپۋتيننىڭ ماسكەۋدە بەيبىت كەلىسسوزدەر جۇرگىزۋ تۋرالى ۇسىنىسىن قابىلداماي، ونى كييەۆكە شاقىرعان ەدى. بۇل تۋرالى ول ABC News ارناسىنا بەرگەن سۇحباتىندا ايتتى.
"ول كييەۆكە كەلە الادى. ەگەر ادام سوعىس كەزىندە كەزدەسكىسى كەلمەسە، ول ارينە، مەن ءۇشىن دە، باسقالار ءۇشىن دە قابىلداي المايتىن نارسەنى ۇسىنادى. بۇل - مەن وعان كييەۆكە كەلۋىن ۇسىنعانىممەن بىردەي"، – دەدى ۋكراينا پرەزيدەنتى.
زەلەنسكييدىڭ پىكىرىنشە، پۋتين مۇنداي ۇسىنىستى كەزدەسۋ ۋاقىتىن كەيىنگە شەگەرۋ ءۇشىن جاساعان.
ۋكراينا باسشىسى، سونىمەن بىرگە، ەلى كۇن سايىن زىمىران شابۋىلىنا جانە ءتۇرلى سوققىلارعا ۇشىراپ جاتقان كەزدە ماسكەۋگە بارا المايتىنىن ايتىپ، ءپۋتيننىڭ مۇنى "جاقسى تۇسىنەتىنىن" جەتكىزدى.
پۋتين 3 قىركۇيەكتە قىتايعا جاساعان ساپارىنان كەيىن زەلەنسكييمەن كەلىسسوزدەردى رەسەي استاناسىندا وتكىزۋگە دايىن ەكەنىن مالىمدەگەن ەدى. ەكى كۇننەن سوڭ شىعىس ەكونوميكالىق فورۋمىندا سويلەگەن سوزىندە رەسەي پرەزيدەنتى ماسكەۋدىڭ "جوعارعى دەڭگەيدەگى كەلىسسوزدەر ءۇشىن ەڭ قولايلى ورىن" ەكەنىن تاعى دا اتاپ ءوتتى.
