Ýkraina prezidenti Vladimir Zelenskii dron shabýyldarynyń jiileýine bailanysty Reseidiń áýe keńistigi azamattyq ushaqtar úshin qaýipti bola bastaǵanyn málimdedi. Ol halyqaralyq áýe kompaniialary men saqtandyrý uiymdaryn osy jaǵdaidy eskerýge shaqyrdy, dep habarlaidy dalanews.kz.
"Resei áýe keńistigin paidalanatyn barlyq áýe kompaniiasyna, saqtandyrý uiymdaryna jáne Reseidiń negizgi áýejailaryna reis oryndaityn tasymaldaýshylarǵa eskertý jasaǵymyz keledi. Resei aspany qaýipsiz bolmai barady. Onyń ústinde drondar ushady, sondyqtan muny eskerý qajet", – dedi Zelenskii úndeýinde.
Ýkraina prezidentiniń aitýynsha, Resei biligi áýe keńistigindegi qaýip týraly tolyq málimet bermegen. Alaida dron shabýyldary jalǵasa berse, eldiń aspany azamattyq reister úshin is júzinde birtindep jabylýy múmkin.
Zelenskii Ýkrainanyń azamattyq ushaqtarǵa qasaqana qaýip tóndirmeitinin de atap ótti.
"Biz jazyqsyz adamdardyń qaza bolǵanyn qalamaimyz. Sondyqtan seriktesterimizge aldyn ala eskertip otyrmyz", – dedi ol.
Onyń sózinshe, bul aqparat Reseidiń Máskeý, Sankt-Peterbýrg jáne basqa da iri qalalaryna ushatyn halyqaralyq áýe kompaniialaryna, sondai-aq sheteldik diplomattarǵa jetkizilýge tiis. Ýkraina Syrtqy ister ministrligi men tiisti mekemeler halyqaralyq uiymdarǵa qajetti málimetterdi usynbaq.
"Drondar ushyp júrgen áýe keńistiginde azamattyq aviatsiia bolmaýy kerek", – dep qorytyndylady Zelenskii.
