Ýkraina prezidenti Vladimir Zelenskiidiń Moldovadan Osloǵa ushýy reseilik drondardyń Moldova áýe keńistigine enýine bailanysty keshiktirilgen. Bul týraly Moldova men Norvegiia biligi málimdedi, dep habarlaidy BBC.
Zelenskii sársenbi kúni 89 jasynda qaitys bolǵan Norvegiia koroli Harald V-tiń jerleý rásimine qatysty. Rásimnen keiin ol Norvegiiadan Islandiia arqyly Kanadaǵa attanǵan.
Norvegiia premer-ministri Ionas Gar Stiore NRK telearnasyna bergen pikirinde Zelenskii otyrǵan ushaqqa dron óte jaqyn kelgenin aitty.
"Ol Moldovadan ushyp shyqqan kezde ushaǵyna dron tiip kete jazdady. Bul – onyń kúndelikti betpe-bet keletin shyndyǵy", – dedi Norvegiia premer-ministri.
Alaida AFP agenttigine pikir bildirgen Ýkraina prezidenti keńsesindegi derekkóz Zelenskiige tikelei qaýip tóngeni týraly málimdemelerdi "asyra aitylǵan" dep baǵalaǵan.
Onyń sózinshe, Moldova men Rýmyniianyń áýe keńistigine dron kirgen kezde dabyl jariialanǵan.
Al Financial Times basylymyna suhbat bergen, prezident ushaǵynyń bortynda bolǵan derekkóz Norvegiia premer-ministriniń málimdemesin rastady. Onyń boljamynsha, bul reaktivti qozǵaltqyshy bar reseilik "Shahed" úlgisindegi dron bolýy múmkin.
FT-ge sóilegen aty-jóni atalmaǵan ýkrainalyq sheneýnik dronnyń Zelenskii mingen ushaqqa baǵyttalýy yqtimal ekenin de joqqa shyǵarmady. Onyń aitýynsha, ushqyshsyz apparat prezident bortyna jetkilikti deńgeide jaqyndaǵan.
Basylym deregine sáikes, Zelenskii drondy atyp túsirý úshin ýkrainalyq F-16 joiǵyshyn áýege kóterýdi usynǵan.
Ýkraina biligi oqiǵaǵa bailanysty tergeý bastady. Dron qulaǵannan keiin zardap shekkender men materialdyq shyǵyn bolǵan joq.
