Búgin Zaısan aýdanynyń sporttyq modýlinde 18 jasqa deıingi qyzdar arasynda oq atýdan «Mergen arý – 2025» atty ashyq aýdandyq birinshilik ótti. Atalmysh jarys Uly Jeńistiń 80 jyldyǵy men Keńes Odaǵynyń batyry Álıa Moldaǵulovanyń 100 jyldyǵyna arnaldy, - dep habarlaıdy Dalanews.kz

Jarysty Zaısan qalasynyń oq atý ortalyǵynyń tóreshileri uıymdastyrdy. Bul sharanyń ereksheligi – qatysýshy qyzdardyń ulttyq kıimmen óner kórsetýi, bul ulttyq dástúrimizge degen qurmetti aıqyndaı tústi.

Jeńimpazdar men júldegerler aýdan ákimi men máslıhat tóraǵasynyń atynan arnaıy dıplomdar men baǵaly syılyqtarmen marapattaldy. Belsendi qatysýshylarǵa alǵys hattar men arnaıy nomınasıalar tabystaldy.

Sharaǵa aýdan ákiminiń orynbasary Rıshat Ramazanov, sport ardageri Sáýle Serikbaeva, oq atýdan jarys júldegerleri - Qanatbaevtar otbasy, Dana Seıfýllına jáne Gúlzat Qýsanbaeva qurmetti qonaq retinde qatysyp, sóz sóıledi.

İs-shara barysynda Uly Otan soǵysynyń ardagerlerin eske alýǵa erekshe mán berildi. Zaısan aýdanynan soǵysqa 7760 adam shaqyrylyp, onyń 6702-si urysqa qatysqan. Soǵystan 3229 adam oralsa, 1817-si maıdanda qaza taýyp, 2923 adam habar-osharsyz ketken.

Zaısan aýdanynan shyqqan batyrlar - Keńes Odaǵynyń batyry Vasılıı Golovchenko, úsh dárejeli «Dańq» ordeniniń ıegeri Qydyrpatsha Bokajanov, soǵys batyrlaryna teńestirilgen Ǵadylbek Sarsekeeev pen Vıktor Gýtovskıı.

Sonymen qatar, 58 adam «Qyzyl Juldyz» ordenimen, 3 adam «Qyzyl Tý» ordenimen, 590 adam I jáne II dárejeli «Jeńis» medaldarymen, 12 adam II-III dárejeli «Qurmet» ordenimen marapattalǵan. Bir azamat - «Qurmet» ordeniniń tolyq ıegeri.

Qazirgi tańda aýdanda bir soǵys ardageri - 102 jastaǵy Qurmanqojanov Zaken ata turady. Jaqynda ol kisi týraly derekti fılm túsirilip, onyń tusaýkeseri 9 mamyr qarsańynda ótedi. Sonymen qatar, aýdanda 97 tyl eńbekkeri turady.

Soǵys ardageri men tyl eńbekkerlerine bir rettik qarjylaı kómek kórsetilip, demeýshilerdiń qoldaýymen azyq-túlik sebetteri men estelik syılyqtar tabystalady.