بۇگىن زايسان اۋدانىنىڭ سپورتتىق مودۋلىندە 18 جاسقا دەيىنگى قىزدار اراسىندا وق اتۋدان «مەرگەن ارۋ – 2025» اتتى اشىق اۋداندىق بىرىنشىلىك ءوتتى. اتالمىش جارىس ۇلى جەڭىستىڭ 80 جىلدىعى مەن كەڭەس وداعىنىڭ باتىرى ءاليا مولداعۇلوۆانىڭ 100 جىلدىعىنا ارنالدى، - دەپ حابارلايدى Dalanews.kz
جارىستى زايسان قالاسىنىڭ وق اتۋ ورتالىعىنىڭ تورەشىلەرى ۇيىمداستىردى. بۇل شارانىڭ ەرەكشەلىگى – قاتىسۋشى قىزداردىڭ ۇلتتىق كيىممەن ونەر كورسەتۋى، بۇل ۇلتتىق داستۇرىمىزگە دەگەن قۇرمەتتى ايقىنداي ءتۇستى.
جەڭىمپازدار مەن جۇلدەگەرلەر اۋدان اكىمى مەن ءماسليحات ءتوراعاسىنىڭ اتىنان ارنايى ديپلومدار مەن باعالى سىيلىقتارمەن ماراپاتتالدى. بەلسەندى قاتىسۋشىلارعا العىس حاتتار مەن ارنايى نوميناسيالار تابىستالدى.
شاراعا اۋدان اكىمىنىڭ ورىنباسارى ريشات رامازانوۆ، سپورت ارداگەرى ساۋلە سەرىكبايەۆا، وق اتۋدان جارىس جۇلدەگەرلەرى - قاناتبايەۆتار وتباسى، دانا سەيفۋللينا جانە گۇلزات قۋسانبايەۆا قۇرمەتتى قوناق رەتىندە قاتىسىپ، ءسوز سويلەدى.
ءىس-شارا بارىسىندا ۇلى وتان سوعىسىنىڭ ارداگەرلەرىن ەسكە الۋعا ەرەكشە ءمان بەرىلدى. زايسان اۋدانىنان سوعىسقا 7760 ادام شاقىرىلىپ، ونىڭ 6702ء-سى ۇرىسقا قاتىسقان. سوعىستان 3229 ادام ورالسا، 1817ء-سى مايداندا قازا تاۋىپ، 2923 ادام حابار-وشارسىز كەتكەن.
زايسان اۋدانىنان شىققان باتىرلار - كەڭەس وداعىنىڭ باتىرى ۆاسيليي گولوۆچەنكو، ءۇش دارەجەلى «داڭق» وردەنىنىڭ يەگەرى قىدىرپاتشا بوكاجانوۆ، سوعىس باتىرلارىنا تەڭەستىرىلگەن عادىلبەك سارسەكەەيەۆ پەن ۆيكتور گۋتوۆسكيي.
سونىمەن قاتار، 58 ادام «قىزىل جۇلدىز» وردەنىمەن، 3 ادام «قىزىل تۋ» وردەنىمەن، 590 ادام I جانە II دارەجەلى «جەڭىس» مەدالدارىمەن، 12 ادام II-III دارەجەلى «قۇرمەت» وردەنىمەن ماراپاتتالعان. ءبىر ازامات - «قۇرمەت» وردەنىنىڭ تولىق يەگەرى.
قازىرگى تاڭدا اۋداندا ءبىر سوعىس ارداگەرى - 102 جاستاعى قۇرمانقوجانوۆ زاكەن اتا تۇرادى. جاقىندا ول كىسى تۋرالى دەرەكتى فيلم ءتۇسىرىلىپ، ونىڭ تۇساۋكەسەرى 9 مامىر قارساڭىندا وتەدى. سونىمەن قاتار، اۋداندا 97 تىل ەڭبەككەرى تۇرادى.
سوعىس ارداگەرى مەن تىل ەڭبەككەرلەرىنە ءبىر رەتتىك قارجىلاي كومەك كورسەتىلىپ، دەمەۋشىلەردىڭ قولداۋىمەن ازىق-تۇلىك سەبەتتەرى مەن ەستەلىك سىيلىقتار تابىستالادى.
