Daýdyń basy Rınattyń "Tileýhan? Ol Qańtar qyrǵyny bolaryn kúni buryn bilse de, tis jarmady. Elden ketip qaldy..." pikirinen bastaldy.
Tanymal tulǵalardyń BAQ betindegi aıtysy birazǵa sozylatyn túri bar.
ULYSMEDIA-ǵa suhbat bergen Zaıytov depýtattyq mandatyn tapsyryp, Túrkıaǵa kóship ketken Tileýhanǵa qurmeti zor ekenin, áıtse de oǵan ókpelep júrgenin aıtqan. Onyń pikirinshe Tileýhan Qańtar tragedıasy bolaryn bilgen, biraq elge jarıa etýge júregi daýalamaǵan.
"Bir aýyz aıtsa bolatyn edi. «Jigitter, osylaı jasalyp jatqan nárse, abaı bolyńdar» dep. Sonysyna ǵana ókpeledim.
Ol jeltoqsan aıynda óz erkimen ketti. Onyń ketýine túrtki bolǵan osy áńgimelerdiń shet jaǵasyn bilýi dep oılaımyn.
Bir jaǵy osyǵan qatyspaıyn dep ketip qalǵan shyǵar. Óıtkeni osy ýaqytqa deıin solardyń qasynda júrgennen keıin, ony da qatysýǵa májbúrleıtin edi. Aıtpaı ketkeni ókpeletti. Aıtýy kerek edi. Ol kiside múmkindik boldy. Biz de oǵan "Aǵa" dep qarap otyrdyq. 104 depýtattyń 103-i ne dese de, biz Bekbolat aǵany tyńdaıtyn edik", – degen-tuǵyn Zaıytov.
Tileýhannyń jaýaby kóp kúttirgen joq.
Eks-depýtat muny ózine jabylǵan jala dep taýyp, Zaıytovtyń álgi málimdemesin qastandyqqa teńedi. Onyń paıymdaýynsha Zaıytov Tileýhanmen deńgeıles tulǵa emes. Óneri de, saıası tájirıbesi de Tileýhannan olqy.
"Qandy Qańtar oqıǵasyn bilip turyp, bizge aıtpady" degen sumdyq aýyr jala japty. Al endi oǵan aýzyna salyp, kádimgideı yńǵaılap "Bekbolat Tileýhan nege sizdi jek kóredi?" dep otyr...
Rınat óneri deńgeıles adam emes, jaqsy deńgeıles adam emes. Saıasattaǵy laýazymy deńgeıles adam emes. Endi qazir ár nársege kóńili tolmaı, aıǵaılap shyqqan adamdar "popýlárnyı" bola beretin zaman ǵoı...
Maǵan tıisken sen (Zaıytovty meńzep otyr, red.). Aıtysta da tıisken sen. Basqa jerlerde de tıisken sen. Anaý klasstas baýyrdyń aıtqany bar ǵoı... "Aǵa, siz kóńilińizge almańyz endi... İship alyp, shegip alyp... Rınat aıta beredi" degennen keıin bir jaǵynan keshirgim kelip júr.
Al shyn nıetinde saıasatker bolamyn degen oıda bolyp jatsań, bul durys nárse emes. Osynyń jeteginde júrmiz, ony óz basym moıyndaımyn dep otsyń! Osydan zıan shegetin tek qana qazaq", – deıdi Tileýhan.
Eks-depýtattyń aıtýynsha Zaıytovtyń saıasatker bolam degen áýselesinen túk shyqpaıdy.
"Saıasatker bolamyn degende, sen "Zańdardy jattaımyn" dep aıttyń ǵoı. Adam Zań jattap "saıasatker" bolmaıdy. Adam tarıhı zańdylyqtardy meńgerip saıasatker bolady. Birnárseni biledi. Ahmet, Mirjaqyp, Álıhandardy qasynda júrgen qazaqtar satty. Biraq sol oq keıin ózderine tıdi...
Qazaq qazaqqa dep janyń ashyǵanda júregiń aýzyńnan shyǵyp keteıin dep tur. Al istelgen sharýa mynaý. Ekijúzdilik pe? Teksizdik pe? Klasstasyń aıtpaqshy "iship alyp, shegip alady" degendeı terpılasyń ba? Chertsyń ba? Qalaı túsinýge bolady buny? Kóp nárseni bilip tursyń ǵoı. Endi osynshama popýlıs bolýǵa, osynshalyqty tanymaldylyqtyń quly bolýǵa bola ma eken?", - dedi Bekbolat Tileýhan.
Al Rınat Zaıytov Bekbolat Tileýhanǵa "sizdiki - "durys", meniki-"aǵattyq" dep, áńgimeni osy jerden doǵaratynyn habarlady.
"Aǵa, ózińizge byltyr ǵana habarlasqandaǵy aıtqan sózim sol sóz. Men sizdi eshteńege qaramastan, aǵa dep qurmetteımin, qaıtalanbas talant - dep jaqsy kóremin! Al keıbir jaǵdaılarda tanytqan osaldyǵyńyzdy týra synasam, ol - inilik nazym, aqyndyq asaýlyǵym.
Ol ókpemniń orny bar dep oılaımyn.
Sebebi: qazirgi ýaqytta bizdiń elde resmı málimetter Qańtardaǵy qyrǵynǵa sizdiń dos tutyp júrgen azamattardy kúdikti tanyp, tergeý júrgizýde.
Demek, eger ol málimetter ras bolsa, sizdiń dostaryńyzdyń josparlarynan habarsyz bolǵanyńyzǵa senbeımin. Al ótirik bolsa, onda qazirgi bılik bizdi aldap, aqymaq kórip, jazyqsyz adamdardyń moınyna júzdegen adamnyń qanyn artqaly tur degen sóz.
Sizdiki qaısysy? Ne bolsa da, eki jaǵdaıda da eshteńe kórmegensip, úndemeı qalý sizge syn aǵa. Jaqsy. Jaýap oılap altyn ýaqytyńyzdy ketirmeńiz. Sizge birdeńe dáleldep, yryldasyp talasý oıymda joq. Óıtkeni Qazaq onsyz da jan-jaqqa toptalyp alyp, qyryq pyshaq bolyp jatyr.
Endi qalmaǵany Bekbolat Tileýhan men Rınattyń jaqtastarynyń shaıqasýy ma? Qurysyn. Aıyp etpeńiz. Ondaı elge esh paıdasy joq, "ónbes ósekter" jarysyna júıkem men ýaqytymdy ketirmeımin. Bekbolat aǵa sizdiki - "durys", meniki- "aǵattyq". Siz - jaqsy, men - jaman. Osy jerden qoıdym. Siz de sóıtetin shyǵarsyz?...", - dep jazdy aıtysker aqyn óziniń álemjelidegi paraqshasynda.
Eks-depýtat Bekbolat Tileýhan bıyl 29 jeltoqsanda depýtattyq mandatyn tapsyrǵan. Artynsha onyń bas keńsesi Túrkıada ornalasqan Búkilálemdik etnosport konfederasıasynyń vıse-prezıdent bolyp taǵaıyndalǵany belgili boldy.
