Kaspiidegi “Hazar qorǵany – 2026” áskeri oqý-jattyǵý kezinde qaza bolǵan 14 sarbazdyń jaqyndaryna bólinetin kómek kólemi shamamen 3,5 mlrd teńgege jetti. Dalanews.kz redaktsiiasy ashyq derekterdi jinaqtap, jariialanǵan somalardy qaita eseptep shyqty.
Eń kóp qarjylai kómekti “Ádilet” partiiasy usyndy
Kómek kórsetýge baǵyttalǵan eń iri bastamany “Ádilet” partiiasy men onyń Iskerlik keńesi kóterdi. Olar qaza bolǵan sarbazdardyń jaqyndary men jaraqat alǵan áskeri qyzmetshilerdi qoldaýǵa 1,5 mlrd teńge jinaǵanyn habarlady. Jinalǵan qarajat “Ulttyq rýh” qoǵamdyq birlestiginiń esepshotyna aýdarylady.
Qazaqstan Halyq keńesi qansha qarajat bólmek?
Qazaqstan Halyq keńesiniń 17 múshesi marqumdardyń otbasylaryna 815 mln teńge kóleminde kómek kórsetetinin málimdedi. Andrei Lavrentev pen Shahmurat Mútálip ár otbasyǵa 25 mln teńgeden berýge ýáde etken.
Budan bólek, Gadji Gadjiev 100 mln teńge, Jumabek Janyqulov 50 mln teńge bólýge daiyn ekenin jetkizdi. Taǵy birneshe kásipker 1 mln teńgeden 10 mln teńgege deiin kómek usynǵan.
Osylaisha, Halyq keńesi jariialaǵan 815 mln teńge keiingi jaǵdaiǵa sai qaita eseptelse, shamamen 915 mln teńgege jetýi múmkin. Alaida keńes jańartylǵan jalpy somany resmi túrde jariialaǵan joq.
Depýtattar men partiialar da qarajat jinaǵan
Quryltai tóraǵasy men depýtattary qaiǵyly jaǵdaidan zardap shekken otbasylarǵa óz qarajatynan 146 mln 650 myń teńge jinaǵan. Bul aqsha da “Ulttyq rýh” qoǵamdyq birlestigi arqyly beriledi.
Respublica partiiasy taǵy 100 mln teńge bóletinin habarlasa, “Aq jol” quramyndaǵy shaǵyn jáne orta biznes ókilderi 50 mln teńgeden astam qarajat jinaǵan.
Beles qurylys kompaniiasy 100 mln teńge kóleminde kómek kórsetýge daiyn ekenin málimdedi. Bank RBK tarapynan 20 mln teńge bólinetini jóninde de aqparat tarady.
Qaiyrymdylyq qorlary 700 mln teńge beredi
Halyk qaiyrymdylyq qory men Bolat Ótemuratov qory qaza tapqan 14 áskeri qyzmetshiniń otbasylaryna 25 mln teńgeden beretinin málimdedi. Sonda bir qordan bólinetin qarjy 350 mln teńgeni quraidy. Eki qordyń kómegin qosqanda 700 mln teńge shyǵady.
Jalpy soma
Jariialanǵan somalardy jinaqtap eseptegende, Halyq keńesiniń 815 mln teńgesi, eki qaiyrymdylyq qorynan beriletin 700 mln teńge, “Ádilet” partiiasynyń 1,5 mlrd teńgesi, Quryltai depýtattarynyń 146,65 mln teńgesi, Respublica partiiasynyń 100 mln teńgesi, “Aq jol” kásipkerleriniń keminde 50 mln teńgesi jáne Beles kompaniiasynyń 100 mln teńgesi shyǵady.
Bank RBK-ǵa qatysty resmi túrde rastalmaǵan 20 mln teńgeni de esepke qossaq, jalpy soma 3 mlrd 431 mln 650 myń teńgege jetedi.
Al Halyq keńesiniń eki múshesi 14 otbasynyń árqaisysyna 25 mln teńgeden berse, bastapqy esepke taǵy 100 mln teńge qosylady. Bul jaǵdaida jariialanǵan kómektiń jalpy kólemi shamamen 3 mlrd 531 mln 650 myń teńge bolady.
Memlekettik ótemaqy bólek tólenedi
Kásipkerler men uiymdar jariialaǵan milliardtarǵa memlekettik tólemder qosylmaǵan.
Merzimdi áskeri qyzmette bolǵan sarbazdyń muragerlerine 500 ailyq eseptik kórsetkish ( 2 mln 162,5 myń teńge) mólsherinde ótemaqy beriledi. Qaza tapqan áskeri qyzmetshilerdiń mártebesi men jalaqysy ártúrli bolǵandyqtan, memleket tóleitin qarajattyń jalpy kólemin qazir naqty esepteý múmkin emes.
