Álemniń jetekshi tehnologiialyq kompaniialary jasandy intellektini damytýǵa sońǵy jyldary 1 trillion dollardan astam qarjy quiyp, bul saladaǵy investitsiia kólemin rekordtyq deńgeige jetkizdi, dep habarlaidy dalanews.kz.
Financial Times basylymynyń málimetinshe, Alphabet (Google), Microsoft, Amazon jáne Meta siiaqty alpaýyt kompaniialar jasandy intellekt infraqurylymyn damytýǵa, derekter ortalyqtaryn keńeitýge jáne jańa AI modelderin ázirleýge buryn-sońdy bolmaǵan kólemde qarjy bólip jatyr.
Sarapshylardyń baǵalaýynsha, bul tórt kompaniianyń 2023 jyldan beri jasandy intellektke baǵyttaǵan jiyntyq investitsiiasy 1 trillion dollardan asty. Qarjynyń negizgi bóligi joǵary ónimdi chipterdi satyp alýǵa, jańa data-ortalyqtar salýǵa jáne bultty esepteý júielerin damytýǵa jumsalýda.
Kompaniialar arasyndaǵy báseke OpenAI iske qosqan ChatGPT servisinen keiin aitarlyqtai kúsheidi. Qazir árbir iri tehnologiialyq korporatsiia ózderiniń generativti jasandy intellekt platformalaryn damytýǵa basymdyq berip otyr.
Sarapshylardyń pikirinshe, aldaǵy birneshe jylda AI salasyna quiylatyn investitsiia kólemi odan ári ósedi. Alaida mundai shyǵyndardyń tiimdiligine qatysty pikirtalas ta kúsheiip keledi. Keibir investorlar kompaniialardyń shyǵyndary óte joǵary bolǵanymen, olardyń naqty qarjylyq qaitarymy ázirge tolyq dáleldenbegenin aitady.
Soǵan qaramastan, jetekshi tehnologiialyq kompaniialar jasandy intellektti aldaǵy onjyldyqtaǵy ekonomikalyq ósimniń negizgi draiverleriniń biri retinde qarastyryp otyr.
