Әлемнің жетекші технологиялық компаниялары жасанды интеллектіні дамытуға соңғы жылдары 1 триллион доллардан астам қаржы құйып, бұл саладағы инвестиция көлемін рекордтық деңгейге жеткізді, деп хабарлайды dalanews.kz.
Financial Times басылымының мәліметінше, Alphabet (Google), Microsoft, Amazon және Meta сияқты алпауыт компаниялар жасанды интеллект инфрақұрылымын дамытуға, деректер орталықтарын кеңейтуге және жаңа AI модельдерін әзірлеуге бұрын-соңды болмаған көлемде қаржы бөліп жатыр.
Сарапшылардың бағалауынша, бұл төрт компанияның 2023 жылдан бері жасанды интеллектке бағыттаған жиынтық инвестициясы 1 триллион доллардан асты. Қаржының негізгі бөлігі жоғары өнімді чиптерді сатып алуға, жаңа дата-орталықтар салуға және бұлтты есептеу жүйелерін дамытуға жұмсалуда.
Компаниялар арасындағы бәсеке OpenAI іске қосқан ChatGPT сервисінен кейін айтарлықтай күшейді. Қазір әрбір ірі технологиялық корпорация өздерінің генеративті жасанды интеллект платформаларын дамытуға басымдық беріп отыр.
Сарапшылардың пікірінше, алдағы бірнеше жылда AI саласына құйылатын инвестиция көлемі одан әрі өседі. Алайда мұндай шығындардың тиімділігіне қатысты пікірталас та күшейіп келеді. Кейбір инвесторлар компаниялардың шығындары өте жоғары болғанымен, олардың нақты қаржылық қайтарымы әзірге толық дәлелденбегенін айтады.
Соған қарамастан, жетекші технологиялық компаниялар жасанды интеллектті алдағы онжылдықтағы экономикалық өсімнің негізгі драйверлерінің бірі ретінде қарастырып отыр.
