Japoniiada uzaq jasaǵandardyń sany rekordtyq deńgeige jetip, 107 677 adamǵa jetti. Olardyń 88%-y – áielder. Bul rette elde týý kórsetkishi tarihi minimýmǵa deiin tómendep otyr, dep habarlaidy dalanews.kz.
Japoniia tarihynda alǵash ret 100 jastan asqan adamdar sany 100 myńnan asyp, qatarynan 56-shy jyl rekord jańartty. Uzaq jasaǵandardyń basym bóligi – áielder. Bul ósim eldegi týý deńgeiiniń kúrt tómendeýi aiasynda baiqalyp otyr. Bul týraly CNN habarlady.
Seisenbi, 15 qyrkúiekte Japoniianyń Densaýlyq saqtaý, eńbek jáne ál-aýqat ministrligi uzaq jasaǵandar sanynyń qatarynan 56-shy jyl ósip otyrǵanyn málimdedi. Qyrkúiek aiyndaǵy málimet boiynsha olardyń sany 107 677 adamǵa jetken. Bul ótken jylmen salystyrǵanda shamamen 8 myń adamǵa kóp.
Ministrlik ókilderiniń aitýynsha, uzaq jasaǵandardyń basym bóligi – áielder. Olar jalpy kórsetkishtiń 88%-yn nemese 94 298 adam. Densaýlyq saqtaý ministri Kenitiro Ýeno bul kórsetkishke oń baǵa berip, jýrnalisterge: «Osynshama adamnyń uzaq ýaqyt boiy belsendi ári deni saý ómir súrip jatqanyna óte qýanyshtymyn», – dedi.
Dúniejúzilik banktiń deregine sáikes, Japoniia ómir súrý uzaqtyǵy boiynsha álemdegi kóshbasshy elderdiń biri sanalady. 2024 jyly eldegi ortasha ómir súrý uzaqtyǵy 84 jas bolǵan. Salystyrý úshin AQSh-ta bul kórsetkish 79 jas.
Ǵalymdar japondardyń uzaq ómir súrýin durys tamaqtaný mádenietimen jáne damyǵan densaýlyq saqtaý júiesimen bailanystyrady. Qalalardaǵy uzaq jumys ýaqytymen tanymal bolǵanyna qaramastan, kóptegen japondyq ómirdiń máni men qýanyshyn tabýǵa úndeitin «ikigai» filosofiiasyn ustanady.
Ministrliktiń málimetinshe, qazir elde álemdegi eń qart adamdardyń biri ómir súrip jatyr. Kioto qalasynyń turǵyny Fýio Kishimoto 114 jasta bolsa, Kýmamoto prefektýrasynyń turǵyny Hikarý Kato 112 jasqa kelgen. Alaida halyqtyń qartaiýy álemdegi tórtinshi iri ekonomika sanalatyn Japoniiaǵa qosymsha salmaq túsirip otyr. Qarttarǵa kútim kórsetý shyǵyndary artyp, eńbekke qabiletti turǵyndar sany azaiýda.
Uzaq ómir súretin jańa býyn qalyptasyp jatqanymen, halqy 123 million adamdy quraityn Japoniiada turǵyndar sany qysqarýyn jalǵastyryp keledi. Buǵan týý kórsetkishiniń tarihi eń tómen deńgeige túsýi sebep. Sońǵy jyldary el bilikti mamandar men jumys kúshin tartý úshin sheteldikterge esigin ashqan edi. Degenmen keiingi ýaqytta shetel azamattaryna qatysty teris kózqarastyń kúsheiýine bailanysty úkimet viza talaptaryn qatańdata bastady.
