Qazaqstanda Reseidegi janarmaiǵa qatysty qiyndyqtarǵa qaramastan benzin men dizel otynynyń tapshylyǵy kútilmeidi, dep habarlaidy dalanews.kz.
Bul týraly Májilis kýlýarynda Energetika ministri Erlan Aqkenjenov málimdedi.
Onyń aitýynsha, qazirgi ýaqytta eldegi janarmai qory ishki suranysty tolyq qamtamasyz etýge jetkilikti.
«Qazir benzin men dizel otynynyń qory 30 kúnnen asady. Naqty aitsaq, 36 kúnge jetedi. Sondyqtan búgingi tańda janarmai tapshylyǵyna qatysty eshqandai másele joq dep senimdi túrde aita alamyz», – dedi ministr.
Aqkenjenov jaz mezgilinde munai ónimderin tutyný kólemi dástúrli túrde artatynyn atap ótti. Onyń sózinshe, ministrlik mundai kezeńge aldyn ala daiyndalyp keledi.
«Biz buǵan daiyndaldyq. Sońǵy úsh jyl boiy osyndai tutyný ósimine daiyndalyp kelemiz. Ásirese jazǵy maýsym men demalys kezeńinde janarmaiǵa suranys artatynyn jaqsy túsinemiz. Sondyqtan qajetti qor aldyn ala jasalady», – dedi ol.
Ministr Reseidegi janarmai naryǵyndaǵy jaǵdaidan vedomstvonyń habardar ekenin aitty. Degenmen Qazaqstan shekarasynda qosymsha shekteýler engizý nemese baqylaýdy kúsheitý ázirge josparlanyp otyrǵan joq.
«Qazirgi tańda baqylaý jetkilikti deńgeide júrgizilýde. Sondyqtan syrtqy shekaralarda baqylaýdy kúsheitý máselesi qaralyp jatqan joq. Biz Qazaqstan Respýblikasynyń syrtqy shekaralarynda baqylaýdy qamtamasyz etý boiynsha barlyq qajetti sharalardy qabyldap jatyrmyz», – dedi Erlan Aqkenjenov.
Buǵan deiin Reseidiń birqatar óńirinde janarmai jetkizýge qatysty qiyndyqtar baiqalǵany habarlanǵan bolatyn. Osyǵan bailanysty qazaqstandyqtar arasynda elde benzin tapshylyǵy bolýy múmkin degen alańdaýshylyq týyndaǵan edi.
