Semei qalasyndaǵy saýda ortalyqtarynyń birinde quqyq qorǵaý organdary men Abai oblysy ákimdigi ókilderiniń qatysýymen «Zań jáne tártip» atty aktsiia ótti,- dep habarlaidy Dalanews.kz
Is-sharanyń basty maqsaty – halyqty qoljetimdi zań kómegimen qamtamasyz etý, mazalaǵan suraqtarǵa túsinikteme berý. Kez kelgen azamat mamandarǵa júginip, quqyq buzýshylyqtar men ákimshilik rásimderden bastap áleýmettik qamsyzdandyrý men turǵyn úi máselelerine deiin túrli salalar boiynsha kásibi keńes ala aldy.
QR Sybailas jemqorlyqqa qarsy is-qimyl agenttiginiń Abai oblysy boiynsha departamentiniń preventsiia basqarmasy basshysynyń orynbasary Saiat Bazanovtyń aitýynsha, bul is-shara halyq arasynda úlken qyzyǵýshylyq týdyrdy.
- Is-sharaǵa oblys ákimdiginiń barlyq qurylymdyq basqarmalary, sondai-aq politsiia, ádilet jáne memlekettik kirister departamentiniń ókilderi qatysýda. Bul aktsiia – tek halyqtyń quqyqtyq saýattylyǵyn arttyrý emes, sonymen qatar memlekettik organdardyń ashyq jumysyn qamtamasyz etý joly, – dep atap ótti ol.
Aktsiiaǵa kelgen turǵyndar memlekettik qyzmetter alý, quqyqtar men mindetterdi saqtaý, quqyq qorǵaý organdarymen ózara áreket etý mehanizmderi týraly suraqtar qoidy. Ár túrli mekemelerdiń ókilderi tolyq ári túsinikti jaýaptar berdi.
«Táýelsiz zertteýler ortalyǵy» qoǵamdyq birlestiginiń jetekshisi Janar Qabidollaqyzy azamattardan kelip túsken ótinishterdiń keń aýqymyna nazar aýdardy:
– Búgingi is-sharanyń negizgi maqsaty – quqyqtyq kómek pen qyzmetterdi adamdarǵa jyldam, sol jerde, dialog formatynda kórsetý. Sonymen qatar bul aktsiia sybailas jemqorlyqqa qarsy sanany qalyptastyrý men nyǵaitýǵa baǵyttalǵan. Munda túrli basqarma men mekemelerdiń ókilderi kelip otyr, olar naqty ári jan-jaqty jaýap berýge daiyn. Azamattardyń kóptegen suraqtary qujat rásimdeýge qatysty, – dedi ol.
