Prezident Qasym-Jomart Toqaev Úkimettiń keńeitilgen otyrysynda Shymkent qalasyndaǵy zańsyz qurylystardy súrý máselesine qatysty pikir bildirdi, dep habarlaidy Dalanews.kz.
"Shymkentte jer telimderine bailanysty kúrdeli másele áli kúnge deiin sheshilmei keledi. Zań aldynda bári birdei. Sondyqtan ótken jyldan beri zańsyz turǵyzylǵan nysandardy súrý jumystary qolǵa alyndy. Bul áreketter keibir synǵa ushyraǵanymen, sheginýdiń qajeti joq. Sebebi ákimdik bul jumysty zań aiasynda atqaryp jatyr. Degenmen halyqpen keri bailanys ornatyp, túsindirý jumystaryn toqtatpaý mańyzdy", – dedi Memleket basshysy.
Sonymen qatar, Prezident qoǵamda ózin belsendi sanaityn toptardyń paida bolǵanyn atap ótti.
"Bul toptar kóbinese áleýmettik jelini paidalanyp, biliktiń durys qabyldanǵan, biraq kópshilikke unamaityn sheshimderin negizsiz daýǵa ainaldyryp, el ishinde alańdaýshylyq týdyrady. Sol sebepti árbir qabyldanǵan sheshimdi halyqqa jan-jaqty jáne túsinikti túrde jetkizý asa mańyzdy. Bul tek Shymkentke ǵana emes, búkil óńirlerge qatysty másele. Barlyq jumys ashyq ári halyqqa túsinikti bolýy qajet", – dep túiindedi Qasym-Jomart Toqaev.
