پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا شىمكەنت قالاسىنداعى زاڭسىز قۇرىلىستاردى ءسۇرۋ ماسەلەسىنە قاتىستى پىكىر ءبىلدىردى، دەپ حابارلايدى Dalanews.kz.
"شىمكەنتتە جەر تەلىمدەرىنە بايلانىستى كۇردەلى ماسەلە ءالى كۇنگە دەيىن شەشىلمەي كەلەدى. زاڭ الدىندا ءبارى بىردەي. سوندىقتان وتكەن جىلدان بەرى زاڭسىز تۇرعىزىلعان نىسانداردى ءسۇرۋ جۇمىستارى قولعا الىندى. بۇل ارەكەتتەر كەيبىر سىنعا ۇشىراعانىمەن، شەگىنۋدىڭ قاجەتى جوق. سەبەبى اكىمدىك بۇل جۇمىستى زاڭ اياسىندا اتقارىپ جاتىر. دەگەنمەن حالىقپەن كەرى بايلانىس ورناتىپ، ءتۇسىندىرۋ جۇمىستارىن توقتاتپاۋ ماڭىزدى"، – دەدى مەملەكەت باسشىسى.
سونىمەن قاتار، پرەزيدەنت قوعامدا ءوزىن بەلسەندى سانايتىن توپتاردىڭ پايدا بولعانىن اتاپ ءوتتى.
"بۇل توپتار كوبىنەسە الەۋمەتتىك جەلىنى پايدالانىپ، بيلىكتىڭ دۇرىس قابىلدانعان، ءبىراق كوپشىلىككە ۇنامايتىن شەشىمدەرىن نەگىزسىز داۋعا اينالدىرىپ، ەل ىشىندە الاڭداۋشىلىق تۋدىرادى. سول سەبەپتى ءاربىر قابىلدانعان شەشىمدى حالىققا جان-جاقتى جانە تۇسىنىكتى تۇردە جەتكىزۋ اسا ماڭىزدى. بۇل تەك شىمكەنتكە عانا ەمەس، بۇكىل وڭىرلەرگە قاتىستى ماسەلە. بارلىق جۇمىس اشىق ءارى حالىققا تۇسىنىكتى بولۋى قاجەت"، – دەپ تۇيىندەدى قاسىم-جومارت توقايەۆ.
