Ánshi Maqpal Júnisova án keshteriniń birinde Zamanbek Nurqadilovtiń ólimine qatysty shyndyqty aıtty, - dep habarlaıdy Dalanews.kz.
"Birese anaý óltirdi deıdi, birese mynaý óltirdi deıdi. Eń sońyna kelip Maqpal óltirdi dep aıtpasa boldy. Ony da kútýge bolady, ony da estip jatyrmyn. Týǵan balalary sondaı áńgime taratyp jatqan kórinedi. Tóbede Alla bar ǵoı. Qolymyz qan bolsa júrmes edik qoı. Zákeń de "Maqpal, meni kelip úsh ret ata sal" deıtin azamat emes qoı", - deıdi ánshi.
Maqpal Júnisova Nurqadilov qaıtys bolǵan kúni úıde bolǵanyn aıtady.
"Bári biledi. Shopyr da biledi. Men úıden shyqqan joqpyn, úıde boldym. Biraq ol kisini ekinshi úıde atyp ketken. Shamamen 7.15-te atyp ketken, sebebi 6.40-ta ol kisimen sóıleskenmin. Myna úıge "Jolama" dep aıǵaılady. "Nege?" dep edim, "Ana úıge tez qaıt" dedi. Balkonnan aıǵaılady. "Záke, nege esikti ashpaısyń?" dedim. Sol kezde Zákeń "Myna úıge kelýshi bolma" dedi.
Ony keıin túsindik qoı, ana úıde qyrylys bolyp jatqan eken sol kezde. Kirmesin dep aıtqan ekenin sonda túsindim. Biraq ony biraz adamdar basqasha keltirip júr eken.
Ashatyn bolsańdar durystap ashyńdar, ashpaıtyn bolsańdar burys áńgime taratýdyń qajeti joq dep oılaımyn. Sebebi bári biledi ǵoı", - deıdi Maqpal Júnisova.
Onyń sózinshe, sol kúni bolǵan nárseniń bári kameraǵa jazylyp qalǵan.
"Qaırattyń ózi (Nurqadilov) meniń ruqsatymsyz sol kúni túsirilgenniń bárin polısıaǵa alyp ketińizder dep buıyrǵan.
Negizi 16 kameranyń 14-inde kim kirdi, kim shyqty - kórinip tur. Shet-jaǵasyn men de kórdim. Polısıa meni kinálaǵan kezde advokatym ekeýimiz "áne tur ǵoı, sony tappaısyńdar ma" degen kezde jigit shoshyp, ketip qaldy. Sosyn bizge kamerany bermeı qoıdy.
Sodan beri 17 jyl ótti. Nege men "óltirip ketti" dep aıǵaılaǵanda, menimen birge balalary, qyzy, ajyrasyp ketken áıeli aıǵaılamady? Ózin-ózi atpady dep nege aıtpady? Ózin-ózi atty dep qol qoıyp bergen men emes, solar ǵoı. Sondyqtan júıkemdi tozdyrmasyn", - deıdi ánshi.
2005 jyldyń 12 qarashasynda Zamanbek Nurqadilov óz úıinde denesindegi atylǵan úsh oǵymen óli kúıinde tabylǵan edi. Eki oq keýdesine tıgen, bireýi basyna tıgen. Bolǵan oqıǵanyń resmı nusqasy boıynsha - Nurqadilov óz-ózine qol jumsaǵan dep tanyldy. Almatydaǵy "Keńsaı" zıratyna jerlengen.
