ءانشى ماقپال ءجۇنىسوۆا ءان كەشتەرىنىڭ بىرىندە زامانبەك ءنۇرقادىلوۆتىڭ ولىمىنە قاتىستى شىندىقتى ايتتى، - دەپ حابارلايدى Dalanews.kz. 

"بىرەسە اناۋ ءولتىردى دەيدى، بىرەسە مىناۋ ءولتىردى دەيدى. ەڭ سوڭىنا كەلىپ ماقپال ءولتىردى دەپ ايتپاسا بولدى. ونى دا كۇتۋگە بولادى، ونى دا ەستىپ جاتىرمىن. تۋعان بالالارى سونداي اڭگىمە تاراتىپ جاتقان كورىنەدى. توبەدە اللا بار عوي. قولىمىز قان بولسا جۇرمەس ەدىك قوي. زاكەڭ دە "ماقپال، مەنى كەلىپ ءۇش رەت اتا سال" دەيتىن ازامات ەمەس قوي"، - دەيدى ءانشى.

ماقپال ءجۇنىسوۆا ءنۇرقادىلوۆ قايتىس بولعان كۇنى ۇيدە بولعانىن ايتادى.

"ءبارى بىلەدى. شوپىر دا بىلەدى. مەن ۇيدەن شىققان جوقپىن، ۇيدە بولدىم. ءبىراق ول كىسىنى ەكىنشى ۇيدە اتىپ كەتكەن. شامامەن 7.15-تە اتىپ كەتكەن، سەبەبى 6.40-تا ول كىسىمەن سويلەسكەنمىن. مىنا ۇيگە "جولاما" دەپ ايعايلادى. "نەگە؟" دەپ ەدىم، "انا ۇيگە تەز قايت" دەدى. بالكوننان ايعايلادى. "زاكە، نەگە ەسىكتى اشپايسىڭ؟" دەدىم. سول كەزدە زاكەڭ "مىنا ۇيگە كەلۋشى بولما" دەدى.

ونى كەيىن تۇسىندىك قوي، انا ۇيدە قىرىلىس بولىپ جاتقان ەكەن سول كەزدە. كىرمەسىن دەپ ايتقان ەكەنىن سوندا ءتۇسىندىم. ءبىراق ونى ءبىراز ادامدار باسقاشا كەلتىرىپ ءجۇر ەكەن.

اشاتىن بولساڭدار دۇرىستاپ اشىڭدار، اشپايتىن بولساڭدار بۇرىس اڭگىمە تاراتۋدىڭ قاجەتى جوق دەپ ويلايمىن. سەبەبى ءبارى بىلەدى عوي"، - دەيدى ماقپال ءجۇنىسوۆا.

ونىڭ سوزىنشە، سول كۇنى بولعان نارسەنىڭ ءبارى كامەراعا جازىلىپ قالعان.

"قايراتتىڭ ءوزى (ءنۇرقادىلوۆ) مەنىڭ رۇقساتىمسىز سول كۇنى تۇسىرىلگەننىڭ ءبارىن پوليسياعا الىپ كەتىڭىزدەر دەپ بۇيىرعان.

نەگىزى 16 كامەرانىڭ 14-ىندە كىم كىردى، كىم شىقتى - كورىنىپ تۇر. شەت-جاعاسىن مەن دە كوردىم. پوليسيا مەنى كىنالاعان كەزدە ادۆوكاتىم ەكەۋىمىز "انە تۇر عوي، سونى تاپپايسىڭدار ما" دەگەن كەزدە جىگىت شوشىپ، كەتىپ قالدى. سوسىن بىزگە كامەرانى بەرمەي قويدى.

سودان بەرى 17 جىل ءوتتى. نەگە مەن "ءولتىرىپ كەتتى" دەپ ايعايلاعاندا، مەنىمەن بىرگە بالالارى، قىزى، اجىراسىپ كەتكەن ايەلى ايعايلامادى؟ ءوزىن-وزى اتپادى دەپ نەگە ايتپادى؟ ءوزىن-وزى اتتى دەپ قول قويىپ بەرگەن مەن ەمەس، سولار عوي. سوندىقتان جۇيكەمدى توزدىرماسىن"، - دەيدى ءانشى. 

2005 جىلدىڭ 12 قاراشاسىندا زامانبەك ءنۇرقادىلوۆ ءوز ۇيىندە دەنەسىندەگى اتىلعان ءۇش وعىمەن ءولى كۇيىندە تابىلعان ەدى. ەكى وق كەۋدەسىنە تيگەن، بىرەۋى باسىنا تيگەن. بولعان وقيعانىڭ رەسمي نۇسقاسى بويىنشا - ءنۇرقادىلوۆ وز-وزىنە قول جۇمساعان دەپ تانىلدى. الماتىداعى "كەڭساي" زيراتىنا جەرلەنگەن.