Quryltai depýtattarynyń BAQ-qa jáne óz sózderinde tek tekserilgen ári shynaiy aqparat berýi mindetti, talapty buzǵan depýtatqa depýtattyq etika aiasynda jaza qoldanylýy múmkin, dep habarlaidy dalanews.kz.
Quryltai tóraǵasynyń orynbasary Daniia Espaeva Quryltaidaǵy brifingte depýtattardyń buqaralyq aqparat quraldaryna bergen málimetterine de talap qoiylatynyn aitty.
«Depýtat óz sózinde, buqaralyq aqparat quraldaryna bergen jaýabynda mindetti túrde tekserilgen, shynaiy aqparat usynýy kerek. Bir nárse oryndalmai jatqanyn aityp nemese qandai da bir derekti keltirip, onyń shynaiy bolmaýy da depýtattyq ádepti buzý bolyp sanalady», – dedi Espaeva.
Onyń aitýynsha, mundai jáne ózge de tártip buzýshylyqtardy depýtattyq ádep jónindegi keńes qaraidy. Keńes depýtatqa qatysty tiisti shara qoldaný týraly sheshim qabyldaidy.
Jańa «Quryltai jáne onyń depýtattarynyń mártebesi týraly» zańǵa sáikes, depýtattyq ádepti buzǵandarǵa birneshe jaza túri qarastyrylǵan. Onyń ishinde sógis jariialaý, kópshilik aldynda keshirim suratý, Quryltaidyń bir otyrysynda nemese keiingi úsh otyrysynda sóz bermeý, otyrystan shyǵarý jáne bir kúndik jalaqysynan aiyrý bar.
Espaevanyń sózinshe, depýtattyq ádepti buzý tek jalǵan aqparat berýmen shektelmeidi. Máselen, sóz sóilep jatqan adamǵa negizsiz eskertý jasaý da ádep talaptaryn buzý bolyp esepteledi.
«Eger depýtattardyń sózinde áriptesteriniń nemese basqa adamdardyń ar-namysy men qadir-qasietine tietin qorlaý sózderi aitylsa, bul, árine, depýtattyq ádepti buzý bolyp sanalady», – dep túsindirdi Quryltai tóraǵasynyń orynbasary.
Sonymen qatar depýtattyq ádep talaptary depýtattarǵa tek jumys barysynda nemese jumys toptarynyń otyrystary kezinde ǵana emes, odan tys ýaqytta da qoldanylady.
