Túrkistan oblysynda ornalasqan kún elektr stansasy – elimizdegi kún energetıkasy sektoryndaǵy «Eni» halyqaralyq energetıkalyq kompanıasynyń alǵashqy iri ınvestısıasy.
Investısıalyq jobanyń jalpy quny 12 mlrd teńgeni quraıdy. Búginde Otyrar aýdanyndaǵy Sháýildir aýylynyń mańynda qýattylyǵy 50 MVt kún elektr stansasynyń qurylysy boıynsha jumystar bastalǵan. Saltanatty rásimge Italıadan arnaıy kelgen delegasıa men Túrkistan oblysy ákiminiń orynbasary Meıirjan Myrzalıev qatysty.
– Energıanyń balamaly túrlerin damytýǵa, kún men jel energıasyn paıdalanatyn tehnologıalardy belsendi engizý úshin barlyq múmkindik bar. Osy oraıda, elektr energıasy kózderin qaıta jańǵyrtý – oblys ekonomıkasynyń basym baǵyttarynyń biri. Túrkistan oblysynda 320 MVt elektr qýatynyń jetispeýshiligi baıqalady. Sondyqtan, oblystaǵy qajettilikti qanaǵattandyrý úshin búginde, kún jáne sý elektr stansıalaryn salý boıynsha 10 ınvestısıalyq jobalar iske asyrylǵan, – dedi oblys ákiminiń orynbasary.
«Eni» halyqaralyq kompanıasy jergilikti enshiles «Arm Wind» JSHS arqyly salyp jatqan elektr stansasy 100 gektar aýmaqty alyp jatyr. Munda 100 myńnan astam fotoelektrli panelder, qosalqy stansıa men uzyndyǵy 8 shaqyrym bolatyn áýe elektr berý jelisi salynatyn bolady.
Elimizdegi kún energetıkasy salasyndaǵy «Eni» tarapynan qolǵa alynǵan alǵashqy iri ınvestısıalyq jobasy alǵashqy elektr energıasyn bıylǵy jyldyń 4-toqsanynda beredi.
2022 jyldyń basynda tolyq aıaqtalyp, eldiń energetıkalyq sektoryn birtindep dekarbonızasıalaýǵa, ıaǵnı kómirqyshqyl gazyn azaıtýǵa óz úlesin qosady. Kún elektr stansasynyń eń bir tıimdiligi – aýany lastamaıdy, ekologıalyq tıimdi.
Túrkistan oblysynda «ArmWind» JSHS, «Hevel Kazahstan» JSHS, «KZT Solar» JSHS sıaqty 9 iri kún elektr stansıasy jáne 6 sý elektr stansıalarynyń qurylysy júrgizilýde. Bıyl Túrkistan oblysynda 52 mlrd. teńgege 120 MVt kún sáýlesinen shyǵatyn stansıalardy salý josparlanǵan.
