Ulttyq quryltai múshesi, islamtanýshy Qairat Joldybaiuly din salasyndaǵy ózekti máselelerdi kóterip, olardy sheshý boiynsha birneshe usynysyn jetkizdi, dep habarlaidy Dalanews.kz.
Onyń aitýynsha, qazirgi tańda din taqyrybynda kez kelgen adam pikir bildirip, keide orynsyz, tipti burmalanǵan aqparat taratýǵa jol berip jatyr.
"Din salasynyń mamany bolsyn-bolmasyn, áiteýir ne bolsa sony aityp júrgender kóbeiip ketti. Sondyqtan osyndai adamdarǵa jaýapkershilik júkteitin zań qabyldaý qajet. Óitkeni jónsiz áńgimeler ásirese jastardyń teris baǵytta bilim alýyna jáne halyqtyń dinge degen kózqarasynyń ózgerýine sebep bolyp otyr", – dedi islamtanýshy.
Sondai-aq ol din men tarihi tulǵalarǵa qatysty orynsyz pikirler men ádepsiz sózderdiń jiilep ketkenin atap ótti.
"Ekinshiden, ál-Farabiden bastap, ata-babalarymyz ustanǵan dástúrli dinge til tigizý úrdisi beleń alyp barady. Alaida mundai áreketter zańmen rettelmegen, kináliler jaýapqa tartylmaidy. Bul – úlken másele", – dep qosty ol.
