«Ridder JEO» AQ biylǵy qysta apatqa ushyrap, ara kidik toqtap qalǵany belgeli. Alaida qondyrǵylardyń tozǵanyna, menshik iesiniń aýysýymen jáne kásiporynnyń milliardtaǵan qaryzyna qaramastan, ShQO ákimdigi qaladaǵy energetika tapshylyǵynyń aldyn alyp, 60 myńǵa jýyq halqy bar qalany jylýmen qamtamasyz etetin energetikalyq nysandy óz baqylaýyna alyp, ony qalpyna keltirýge kiristi.
– Mańyzdy jumystyń birinshi kezeńi bastaldy. Barlyq 6 qazandyq kúrdeli jóndeýdi qajet etedi. Bul rette bizde jylý berý maýsymy qarsańynda qysqa merzim men halyq aldynda úlken jaýapkershilik tur. Barlyq kúrdeli tehnikalyq jabdyqtardy aýystyramyz. Aitalyq, 6 Úlken sharly diirmendi "Qazmyrysh" zaýyty jasaidy. Al qalǵan basqa jabdyqtar negizinen ShQO zaýyttarynda jóndeledi.
Taǵy bir mańyzdy mindet – ǵimarattyń kontýryn jabý jáne jylýdyń shyǵýyna jol bermeýge de basa mán berip otyrmyz.
Úshinshi mindet – shańdy joiý. Jumysshylar myna shań-tozańmen tynystamas úshin, ondaǵan jyldar boiy jumys istemegen jeldetkishti qalpyna keltirý qajet.
Tórtinshi mindet – energetikalyq bólik. Munda bar 3 týrbina 50 MVt-tan astam óndire alady, biraq bul qazir múmkin emes. Biz olardy óz tutynýymyzdy jabý úshin 25-30 MVt-qa shyǵarǵymyz keledi, al energiianyń az mólsherin «Qazmyryshqa» nemese qalaǵa berý josparlanýda, – dedi ShQO ákimi Danial Ahmetov.
Biraq qazir 1 traktini jóndeýdi aiaqtaý jáne rezervtik jelini iske qosý, sondai-aq órtten keiin qurylymdardy qalpyna keltirý boiynsha jumystar júrgizilýde.
Sonymen qatar JEO-na portaldyq kran satyp alý kerek. Atqarýshy bilik jańasyn satyp almaq, bolmasa kómirdi túsirý máselesin sheshý úshin 2 ekskavator taýyp bermekshi. Stantsiianyń mazýt qondyrǵylary da jumys jaǵdaiyna keltirildi. Alaida JEO júregi, Baget stantsiiasy kúrdeli jóndeýdi qajet etedi.
Sonymen qatar, kúl úiindisinde de aýyqymdy jóndeý jumystary júrgiziletin bolady. Mamandar bul máseleniń tehnikalyq sheshimin oilastyryp úlgergen. Jóndeý jumystary kezinde kúl úiindisiniń ekinshi bóligin qaita jańartý josparlap otyr.
Taǵy bir másele Gromotýha ózeninde shuǵa paida bolǵan kezeńde jylý kózin jáne jalpy qalany sýmen qamtamasyz etýde qiyndyqtar týyndaityny belgili. «Vodokanal Ridder» mekemesiniń basshylyǵy qala turǵyndary men stansasyn úzdiksiz sýmen qamtamasyz etý úshin jobalardy ázirleýde.
Ridderde sońǵy 5 jylda alǵash ret jylý jelileriniń gidravlikalyq synaqtary júrgizildi. 3,3 shaqyrym qubyr aýystyrylady. Aita ketý kerek, merdigerler jumysty qarjylandyrý bastalmai jatyp iske kirisip ketti.
Aitpaqshy, 5 jyl buryn osynda jumys istegen jáne nysandy ishinen biletin JEO-nyń jańa basshysynyń aitýynsha, burynǵy ieleriniń nemqurailyǵynan jylý ortalyǵyn qaita qurýǵa týra keletinin jetkizdi.
– Jylý elektr ortalyǵynyń menshik nysanyna keletin bolsaq, onyń memlekettik baqylaýǵa ótýin qamtamasyz etý jumystaryn júrgizip jatyrmyz. Ókinishke orai, bul nysandy óz milliardtaryna jóndeitin investor keledi degen úmit joq. Ondai metsenattar tabylmaidy. Sondyqtan biz jumys isteimiz. Bul JEO bólimshesi «Óskemen jylý jelileri» AQ quramynda bolady, kelisim-shart jasaldy. Quqyqtyq máseleler sheshilýde, – dep qorytyndylady Danial Ahmetov.
