Qazaqstanda investorlarǵa “qolaily orta qalyptasyp jatyr” degen pikir jii aitylady. Alaida is júzinde iri jobalardyń ózi biýrokratiialyq kedergilerge tap bolyp jatady. Sonyń aiqyn mysaly – quny 2,7 mlrd teńgelik óndiris jobasy. Investor ailap júrip bastai almaǵan istiń túiini tek prokýratýranyń aralasýymen sheshilgen, dep habarlaidy Dalanews.kz.
Angolt GMBH kompaniiasy 2025 jyldyń qyrkúieginen beri arnaiy ekonomikalyq aimaqta metall buiymdaryn shyǵaratyn zaýyt ashýdy josparlaǵan. Joba el ekonomikasyna serpin beredi dep baǵalanyp, jalpyulttyq pýlǵa engizilgen.
Alaida qarjysy men jospary daiyn bolǵanyna qaramastan, memlekettik organdar kelisimdi sozbaqqa salǵan. Saldarynan kompaniia qajetti jer telimin ala almai, birneshe ai boiy resmi kelisim kútken. Sońynda ýákiletti organdar kásipkerge jer berýden bas tartqan.
Mundai sheshimniń sebepteri naqty túsindirilmegen. Bul rette atalǵan joba el úshin mańyzdy bastamalardyń qatarynda bolǵandyqtan, oǵan qoldaý kórsetilýi tiis edi.
Keiin prokýratýranyń aralasýymen másele qaita qaralyp, birlesken jiyn ótkizilgen. Nátijesinde investordyń quqyǵy qorǵalyp, kompaniiaǵa kólemi 1 gektar jer telimi berildi.
Osylaisha, birneshe aiǵa sozylǵan kedergiden keiin jobaǵa jol ashyldy.
Buǵan deiin
Eske salaiyq, jaqynda “PureWood” JShS jetekshisi, investorlar quqyǵyn qorǵaýshy Darhan Káribaev Qazaqstandaǵy investitsiialyq ahýalǵa qatysty Dalanews.kz redaktsiiasyna pikir bildirgen edi. Ol Qostanai oblysynyń tájiribesine súiene otyryp, elde investorlar úshin birqatar qolaily jaǵdailar jasalyp jatqanyn atap ótken.
Sarapshy óńirlerde iri óndiristik jobalar júzege asyrylyp, investitsiia tartý jumystary júieli túrde júrgizilip jatqanyn jetkizdi.
Ol ásirese arnaiy ekonomikalyq aimaqtar men indýstriialyq infraqurylym investorlar úshin mańyzdy artyqshylyq ekenin atap ótken. Mundai alańdarda daiyn kommýnikatsiialar men jeńildikter qarastyrylǵandyqtan, kásip ashý protsesi jeńildeýi tiis.
Sonymen qatar ol investor úshin eń bastysy – turaqtylyq pen memlekettik organdar tarapynan naqty ári jedel qoldaý ekenin jetkizgen. Iaǵni, bizneske kedergi keltirmeitin, kerisinshe, onyń damýyna jol ashatyn tiimdi júie qalyptasýy qajet.
Alaida keiingi jaǵdailar kórsetkendei, bul aitylǵan múmkindikter keide is júzinde tolyq iske aspai, investorlar biýrokratiialyq tosqaýyldarǵa tap bolyp jatady.
