Qazaqstannyń Ishki ister ministrligi internet alaiaqtyq derekteriniń kóbeiip bara jatqanyn eskertti. Ásirese "investitsiia", "jobaǵa qarjy salý" arqyly jyldam ári kepildi tabys ýáde etetin shemalar jiilegen, dep habarlaidy Dalanews.kz.
Politsiianyń málimetinshe, alaiaqtar messendjerler men áleýmettik jelilerde dipfeik pen jasandy intellekt tehnologiialaryn paidalanyp, tanymal adamdardyń beinesin qoldaný arqyly azamattardy jalǵan "investitsiialyq jobalar" men "qorlarǵa" tartýda.
"Jalǵan brokerlermen bailanysqa túsken azamattarǵa mobildi qosymshalar ornatý, siltemelerge ótý nemese úshinshi tulǵalardyń esepshottaryna "investitsiia", "akkaýntty belsendirý" ne "paidany arttyrý" degen jeleýmen aqsha aýdarý usynylady. Qarajat aýdarylǵannan keiin alaiaqtar bailanysyn úzip, ýáde etilgen tabys túspeidi. Kei jaǵdaida olar "salyq", "komissiia", "saqtandyrý jarnasy" degen syltaýmen taǵy da aqsha talap ete beredi", - dep habarlady IIM.
Osyǵan bailanysty IIM-niń kiberqylmysqa qarsy is-qimyl departamenti azamattarǵa mynadai keńes beredi:
- "kepildi tabys" týraly ýádelerge senbeý;
- belgisiz adamdarǵa jáne kúmándi esepshottarǵa aqsha aýdarmaý;
- kúdikti siltemelerge ótpeý;
- tekserilmegen kózderden qosymshalar ornatpaý;
- kompaniialar týraly aqparatty tek resmi derekkózder men memlekettik reestrler arqyly tekserý;
- investitsiialyq naryqty zerttep, tek senimdi ári resmi kompaniialarǵa júginý.
IIM internet-alaiaqtyqpen kúresti jalǵastyryp, azamattardy onlain qarjylyq operatsiialar kezinde barynsha saq bolýǵa shaqyrady.
