Indonezıa Respýblıkasynyń Qazaqstandaǵy Tótenshe jáne Ókiletti elshisi Rahmat Promonomen júzdesken Túrkistan oblysynyń ákimi Janseıit Túımebaev osyndaı ýaǵdalastyqqa qol jetkizdi. Túrkistan qalasyna arnaıy kelgen elshini qabyldaǵan óńir basshysy Indonezıanyń áleýeti joǵary memleket ekenine toqtaldy.
– Indonezıa týrızm salasynda tabysqa jetip júrgen memleket ekenin bilemiz. Bizdiń óńir úshin osy eldiń týrızmdi damytý baǵytyndaǵy tájirıbelerin meńgerý mańyzdy. Sebebi, Indonezıada Qazaqstandy, onyń ishinde Túrkistandaǵy Qoja Ahmet Iasaýı kesenesin kórgisi keletin saıahatshylar kóp. Áýejaı salynǵan soń oblysymyzǵa týrıser aǵylatyny anyq. Qazir ındonezıalyqtar Ózbekstannyń Samarqan, Buhara qalalaryna jıi saıahattaıdy. Olardy oblysymyzǵa shaqyrýǵa múmkindik mol. Óıtkeni, Túrkistan oblysynda taý da, ózen de, kól de, qum da, kýrortty aımaqtar da, tarıhı-mádenı eskertkishter de kóp.
Túrkistan-Samarhan-Indonezıa týrısik baǵytyn qalyptastyryp, áýe reısterin asha bilsek, týrızmdi damytýǵa tıimdi bolmaq. Tek týrızm salasy emes, saýda-sattyq pen ekonomıkalyq áriptestikti de nyǵaıtamyz. Óńirimiz Indonezıaǵa baqsha ónimderin, et pen kókónis eksporttaýǵa qabiletti. Ol elden de bizge tıimdi jobalar usynylatynyna senimdimin. Túrkistan oblys ortalyǵy atanǵaly beri osynda atbasyn burǵan tuńǵysh elshi bolǵanyńyz úshin sizge alǵys aıtamyn. Elimiz úshin qasterli qala dep áspetteletin Túrkistandy damytýǵa úles qosamyz, ınvestısıa salyp, birge jumys atqaramyz deseńizder áriptestikti tereńdetýge ázirmiz. Sizdi 28 qyrkúıekte Túrkistan qalasynda ótetin halyqaralyq ınvestısıalyq jáne týrısik forýmǵa shaqyramyn, – degen óńir basshysy áriptestik pen dostyq-ekonomıkalyq baılanysty nyǵaıta túsý úshin jıi kezdesip, taǵy da kelissózder júrgizýge daıyn ekenin aıtty.
Óz kezeginde Rahmat Promono jyly qarsy alǵan óńir basshysyna rızashylyǵyn bildirip, Túrkistan qalasynan erekshe áser alǵanyn jetkizdi.
– Ózbekstandaǵy Samarqan, Buhara qalalaryn aralap kórdim. Biraq, Túrkistandaǵy Qoja Ahmet Iasaýıdiń kesenesi aıryqsha áser etti. Sáýletti eskertkish eken. Meniń bul eldegi mısıalarym – saıası jáne ekonomıkalyq baılanysty kúsheıtý. Saıası turǵyda Indonezıa men Qazaqstan senimdi áriptester ekenin bilesizder. Túrli máselelerde, halyqaralyq forýmdarda qos el bir-birin qoldap daýys berip júredi. Endi biz ekonomıkalyq jáne saýda-sattyq baǵytyndaǵy jumystardy tereńdete túsýge nıettimiz. Sizderdi kelesi jyly Indonezıada ótetin týrısik kórmege shaqyramyz. Túrkistannyń týrızm salasyn damytýǵa bizdiń el de úles qosady degen senimdemin, – degen ol eki el arasyndaǵy vıza máselesin jeńildete túsý kerektigine toqtaldy.
Kezdesý sońynda oblys ákimi men mártebeli meıman bir-birimen estelik syılyqtar almasty. Indonezıadan kelgen elshilerge Túrkistannyń Bas josparyna usynylǵan jobalar kórsetildi.
Túrkistan oblysy ákiminiń baspasóz qyzmeti
