Indoneziia Respýblikasynyń Qazaqstandaǵy Tótenshe jáne Ókiletti elshisi Rahmat Promonomen júzdesken Túrkistan oblysynyń ákimi Janseiit Túimebaev osyndai ýaǵdalastyqqa qol jetkizdi. Túrkistan qalasyna arnaiy kelgen elshini qabyldaǵan óńir basshysy Indoneziianyń áleýeti joǵary memleket ekenine toqtaldy.
– Indoneziia týrizm salasynda tabysqa jetip júrgen memleket ekenin bilemiz. Bizdiń óńir úshin osy eldiń týrizmdi damytý baǵytyndaǵy tájiribelerin meńgerý mańyzdy. Sebebi, Indoneziiada Qazaqstandy, onyń ishinde Túrkistandaǵy Qoja Ahmet Iasaýi kesenesin kórgisi keletin saiahatshylar kóp. Áýejai salynǵan soń oblysymyzǵa týrister aǵylatyny anyq. Qazir indoneziialyqtar Ózbekstannyń Samarqan, Buhara qalalaryna jii saiahattaidy. Olardy oblysymyzǵa shaqyrýǵa múmkindik mol. Óitkeni, Túrkistan oblysynda taý da, ózen de, kól de, qum da, kýrortty aimaqtar da, tarihi-mádeni eskertkishter de kóp.
Óz kezeginde Rahmat Promono jyly qarsy alǵan óńir basshysyna rizashylyǵyn bildirip, Túrkistan qalasynan erekshe áser alǵanyn jetkizdi.
– Ózbekstandaǵy Samarqan, Buhara qalalaryn aralap kórdim. Biraq, Túrkistandaǵy Qoja Ahmet Iasaýidiń kesenesi airyqsha áser etti. Sáýletti eskertkish eken. Meniń bul eldegi missiialarym – saiasi jáne ekonomikalyq bailanysty kúsheitý. Saiasi turǵyda Indoneziia men Qazaqstan senimdi áriptester ekenin bilesizder. Túrli máselelerde, halyqaralyq forýmdarda qos el bir-birin qoldap daýys berip júredi. Endi biz ekonomikalyq jáne saýda-sattyq baǵytyndaǵy jumystardy tereńdete túsýge niettimiz. Sizderdi kelesi jyly Indoneziiada ótetin týristik kórmege shaqyramyz. Túrkistannyń týrizm salasyn damytýǵa bizdiń el de úles qosady degen senimdemin, – degen ol eki el arasyndaǵy viza máselesin jeńildete túsý kerektigine toqtaldy.
Kezdesý sońynda oblys ákimi men mártebeli meiman bir-birimen estelik syilyqtar almasty. Indoneziiadan kelgen elshilerge Túrkistannyń Bas josparyna usynylǵan jobalar kórsetildi.
Túrkistan oblysy ákiminiń baspasóz qyzmeti
