Konstitýtsiialyq sot Ońtústik Koreia prezidenti Iýn Sok Iolge qatysty impichmentti zańdy dep tanyp, ony qyzmetinen bosatty. Bul sheshim 2024 jyldyń jeltoqsan aiynda áskeri tótenshe jaǵdai engizýge talpynǵany úshin qabyldandy, dep habarlaidy Dalanews.kz.
Yohnap agenttiginiń málimetinshe, sot sheshimi dereý kúshine engen. Osyǵan bailanysty elde 60 kún ishinde kezekten tys prezidenttik sailaý ótýi tiis. Aldyn ala boljam boiynsha, sailaý 3 maýsymǵa belgilenýi múmkin.
Ótken jyldyń 3 jeltoqsanynda prezident Iýn Sok Iol oppozitsiiany “memleketke qarsy áreket jasady” dep aiyptap, elde áskeri tótenshe jaǵdai jariialady. Ol áskeri kúshter men politsiia qyzmetkerlerin Ulttyq jinalys ǵimaratyna jiberip, depýtattardyń bul jarlyqty joiý týraly daýys berýine kedergi keltirdi jáne birqatar saiasatkerlerdi qamaýǵa alýǵa buiryq berdi.
Buǵan jaýap retinde depýtattar, onyń ishinde bileýshi partiia músheleri de, jinalyp, áskeri tótenshe jaǵdaidy joiý jóninde biraýyzdan sheshim qabyldady. Artynsha, jeltoqsannyń ortasynda Ulttyq jinalys prezidentke Konstitýtsiia men zańdardy buzdy degen aiyppen impichment jariialady.
Sot Iýn Sok Iolge taǵylǵan aiyptardyń basym bóligin negizdi dep tapty. Atap aitqanda, onyń áskeri tótenshe jaǵdai engizýge eshqandai zańdy quqyǵy bolmaǵanyn jáne qarýly kúshterdi parlamenttiń jumysyna kedergi jasaý úshin paidalanǵanyn anyqtady.
Qazirgi tańda 64 jastaǵy Iýn Sok Iolge “búlik jasaýǵa talpynǵany” úshin qylmystyq is qozǵalyp otyr. Ol – Ońtústik Koreia tarihynda qyzmettegi kezinde tutqyndalǵan alǵashqy prezident.
