كونستيتۋسيالىق سوت وڭتۇستىك كورەيا پرەزيدەنتى يۋن سوك ولگە قاتىستى يمپيچمەنتتى زاڭدى دەپ تانىپ، ونى قىزمەتىنەن بوساتتى. بۇل شەشىم 2024 جىلدىڭ جەلتوقسان ايىندا اسكەري توتەنشە جاعداي ەنگىزۋگە تالپىنعانى ءۇشىن قابىلداندى، دەپ حابارلايدى Dalanews.kz.
Yohnap اگەنتتىگىنىڭ مالىمەتىنشە، سوت شەشىمى دەرەۋ كۇشىنە ەنگەن. وسىعان بايلانىستى ەلدە 60 كۇن ىشىندە كەزەكتەن تىس پرەزيدەنتتىك سايلاۋ ءوتۋى ءتيىس. الدىن الا بولجام بويىنشا، سايلاۋ 3 ماۋسىمعا بەلگىلەنۋى مۇمكىن.
وتكەن جىلدىڭ 3 جەلتوقسانىندا پرەزيدەنت يۋن سوك ءول وپپوزيسيانى “مەملەكەتكە قارسى ارەكەت جاسادى” دەپ ايىپتاپ، ەلدە اسكەري توتەنشە جاعداي جاريالادى. ول اسكەري كۇشتەر مەن پوليسيا قىزمەتكەرلەرىن ۇلتتىق جينالىس عيماراتىنا جىبەرىپ، دەپۋتاتتاردىڭ بۇل جارلىقتى جويۋ تۋرالى داۋىس بەرۋىنە كەدەرگى كەلتىردى جانە ءبىرقاتار ساياساتكەرلەردى قاماۋعا الۋعا بۇيرىق بەردى.
بۇعان جاۋاپ رەتىندە دەپۋتاتتار، ونىڭ ىشىندە بيلەۋشى پارتيا مۇشەلەرى دە، جينالىپ، اسكەري توتەنشە جاعدايدى جويۋ جونىندە ءبىراۋىزدان شەشىم قابىلدادى. ارتىنشا، جەلتوقساننىڭ ورتاسىندا ۇلتتىق جينالىس پرەزيدەنتكە كونستيتۋسيا مەن زاڭداردى بۇزدى دەگەن ايىپپەن يمپيچمەنت جاريالادى.
سوت يۋن سوك ولگە تاعىلعان ايىپتاردىڭ باسىم بولىگىن نەگىزدى دەپ تاپتى. اتاپ ايتقاندا، ونىڭ اسكەري توتەنشە جاعداي ەنگىزۋگە ەشقانداي زاڭدى قۇقىعى بولماعانىن جانە قارۋلى كۇشتەردى پارلامەنتتىڭ جۇمىسىنا كەدەرگى جاساۋ ءۇشىن پايدالانعانىن انىقتادى.
قازىرگى تاڭدا 64 جاستاعى يۋن سوك ولگە “بۇلىك جاساۋعا تالپىنعانى” ءۇشىن قىلمىستىق ءىس قوزعالىپ وتىر. ول – وڭتۇستىك كورەيا تاريحىندا قىزمەتتەگى كەزىندە تۇتقىندالعان العاشقى پرەزيدەنت.
