Talǵar aýdandyq sotynda Hasan Qasymbaevqa qatysty sot protsessi salystyrmaly túrde tynysh ótip jatyr. Is materialdary 36 tomnan turady. Osy ýaqytqa deiin jábirlenýshi Arman Álimov pen alty kýágerden jaýap alyndy. Tek jábirlenýshi Aiýpjan Tájiev sotqa kelmegendikten, ony uiymdasqan qylmyspen kúres qyzmetiniń qyzmetkerleri májbúrlep jetkizdi. Ol túsinikteme bere bastady, alaida onyń mazmunyn jariia etýge tyiym salynǵan, dep habarlaidy Dalanews.kz Nege.kz-ke silteme jasap.
H.Qasymbaevtyń advokattary isti sottalýshylardyń qatysýynsyz qaraýǵa qarsylyq bildirip, sýdia Ainagúl Týkýbaevany shettetýdi surady. Sottalýshylardyń advokattary osymen tórtinshi ret sýdiany aýystyrýǵa ótinish bildirip otyr.Belgili bolǵandai, jábirlenýshi Aiýpjan Tájiev sot otyrysyna Uiymdasqan qylmysqa qarsy kúres qyzmetkerlerimen jetkizilgen. Ol sotta jaýap berýdi bastady. Alaida, onyń sotta bergen jaýabyn jariialaýǵa ruqsat joq. Esterińizde bolsa, jýrnalisterge jábirlenýshiniń aiǵaqtaryn jariialaýǵa tyiym salynǵan.
Kezekti protsestiń sońynda NEGE tilshisi búgingi sot otyrysyna qatysty H.Qasymbaevtyń advokaty Gúlmira Babajanovanyń pikirin bildi.
Advokat Babajanovanyń aitýynsha, bul jerde sottalýshylardyń quqyǵy buzylyp otyr. Sol sebepti olar sýdiaǵa qarsylyq bildirgen.
"Sottalýshylardyń úsheýi sot otyrysyna kelgen joq, olar densaýlyǵyna bailanysty aryz jazǵan bolatyn. Ony konvoi qyzmetkerlerinen berip jiberdi. Is aiyptalýshylardyń qatysýymen ǵana júrgizilýi kerek. Qylmystyq-protsestik kodekstiń 335-babyna sáikes, sottalýshylardyń qatysýynsyz tek qana olar sot protsesinen bas tartqan jaǵdaida ǵana ótkiziledi. Alaida sot oǵan qaramastan, "sottalýshylar bas tartty, sondyqtan qylmystyq isti ary qarai sottalýshylardyń qatysýynsyz qaraimyz" dep aitty. Biraq olar otyrǵan mekemeden meditsinalyq qujat salynǵan joq. Sýdia zań talaptaryn buzyp otyr dep oilaimyz. Olarǵa qatysty aýyr sanattaǵy qylmystyq is qozǵalyp otyr ǵoi. Sýdia olardyń tikelei quqyǵyn buzyp otyr. Sol sebepti sýdiaǵa qarsylyq bildirdik. Óitkeni, olardyń qatysýynsyz qalai qaralady?", deidi advokat Babajanova.
