تالعار اۋداندىق سوتىندا حاسان قاسىمبايەۆقا قاتىستى سوت پروسەسسى سالىستىرمالى تۇردە تىنىش ءوتىپ جاتىر. ءىس ماتەريالدارى 36 تومنان تۇرادى. وسى ۋاقىتقا دەيىن جابىرلەنۋشى ارمان ءالىموۆ پەن التى كۋاگەردەن جاۋاپ الىندى. تەك جابىرلەنۋشى ايۋپجان تاجييەۆ سوتقا كەلمەگەندىكتەن، ونى ۇيىمداسقان قىلمىسپەن كۇرەس قىزمەتىنىڭ قىزمەتكەرلەرى ماجبۇرلەپ جەتكىزدى. ول تۇسىنىكتەمە بەرە باستادى، الايدا ونىڭ مازمۇنىن جاريا ەتۋگە تىيىم سالىنعان، دەپ حابارلايدى Dalanews.kz Nege.kz-كە سىلتەمە جاساپ.
ح.قاسىمبايەۆتىڭ ادۆوكاتتارى ءىستى سوتتالۋشىلاردىڭ قاتىسۋىنسىز قاراۋعا قارسىلىق ءبىلدىرىپ، سۋديا ايناگۇل تۋكۋبايەۆانى شەتتەتۋدى سۇرادى. سوتتالۋشىلاردىڭ ادۆوكاتتارى وسىمەن ءتورتىنشى رەت سۋديانى اۋىستىرۋعا ءوتىنىش ءبىلدىرىپ وتىر.بەلگىلى بولعانداي، جابىرلەنۋشى ايۋپجان تاجييەۆ سوت وتىرىسىنا ۇيىمداسقان قىلمىسقا قارسى كۇرەس قىزمەتكەرلەرىمەن جەتكىزىلگەن. ول سوتتا جاۋاپ بەرۋدى باستادى. الايدا، ونىڭ سوتتا بەرگەن جاۋابىن جاريالاۋعا رۇقسات جوق. ەستەرىڭىزدە بولسا، جۋرناليستەرگە جابىرلەنۋشىنىڭ ايعاقتارىن جاريالاۋعا تىيىم سالىنعان.
كەزەكتى پروسەستىڭ سوڭىندا NEGE ءتىلشىسى بۇگىنگى سوت وتىرىسىنا قاتىستى ح.قاسىمبايەۆتىڭ ادۆوكاتى گۇلميرا باباجانوۆانىڭ پىكىرىن ءبىلدى.
ادۆوكات باباجانوۆانىڭ ايتۋىنشا، بۇل جەردە سوتتالۋشىلاردىڭ قۇقىعى بۇزىلىپ وتىر. سول سەبەپتى ولار سۋدياعا قارسىلىق بىلدىرگەن.
"سوتتالۋشىلاردىڭ ۇشەۋى سوت وتىرىسىنا كەلگەن جوق، ولار دەنساۋلىعىنا بايلانىستى ارىز جازعان بولاتىن. ونى كونۆوي قىزمەتكەرلەرىنەن بەرىپ جىبەردى. ءىس ايىپتالۋشىلاردىڭ قاتىسۋىمەن عانا جۇرگىزىلۋى كەرەك. قىلمىستىق-پروسەستىك كودەكستىڭ 335-بابىنا سايكەس، سوتتالۋشىلاردىڭ قاتىسۋىنسىز تەك قانا ولار سوت پروسەسىنەن باس تارتقان جاعدايدا عانا وتكىزىلەدى. الايدا سوت وعان قاراماستان، "سوتتالۋشىلار باس تارتتى، سوندىقتان قىلمىستىق ءىستى ارى قاراي سوتتالۋشىلاردىڭ قاتىسۋىنسىز قارايمىز" دەپ ايتتى. ءبىراق ولار وتىرعان مەكەمەدەن مەديسينالىق قۇجات سالىنعان جوق. سۋديا زاڭ تالاپتارىن بۇزىپ وتىر دەپ ويلايمىز. ولارعا قاتىستى اۋىر ساناتتاعى قىلمىستىق ءىس قوزعالىپ وتىر عوي. سۋديا ولاردىڭ تىكەلەي قۇقىعىن بۇزىپ وتىر. سول سەبەپتى سۋدياعا قارسىلىق بىلدىردىك. ويتكەنى، ولاردىڭ قاتىسۋىنسىز قالاي قارالادى؟"، دەيدى ادۆوكات باباجانوۆا.
