Respýblikashylar atynan úmitker Donald Tramp AQSh prezidentin sailaýda jeńiske jetti. Ekinshi basty úmitker Kamala Harris málimdeme jasady, - dep habarlaidy Dalanews.kz.
AQSh prezidenttigine demokrattar atynan kandidat bolǵan vitse-prezident Kamala Harris respýblikashyldar atynan túsken qarsylasy Donald Trampty 2024 jylǵy prezidenttik sailaýdaǵy jeńisimen quttyqtady. Olar telefon arqyly sóilesken.
"Donald Tramp pen Kamala Harris sársenbide tańerteń telefonmen sóilesti. Harris Trampty tarihi jeńisimen quttyqtady. Prezident Tramp vitse-prezidenttiń kúshin, kásibiligin jáne tabandylyǵyn joǵary baǵalady, eki kóshbasshy da eldegi birliktiń mańyzyn moiyndady", - dep jazylǵan Tramptyń sailaýaldy shtabynyń málimdemesinde.
Kamala Harris sailaýda jeńilgennen keiin jaqtastarynyń aldynda sóz sóiledi.
Vashingtondaǵy Hovard ýniversitetiniń bas ǵimaratynyń aldyna jinalǵan jaqtastaryna sóilegen sózinde Harris sailaý nátijelerin "qabyldaýlary kerek" ekenin jáne Baiden ákimshiligi jańadan sailanǵan prezident Trampqa, onyń komandasyna ótpeli kezeńde kómektesýge daiyn ekenin aitty. Sonymen qatar "biliktiń beibit jolmen berilýin" qamtamasyz etýge ýáde berdi.
Aita keteiik, buǵan deiin L.N. Gýmilev atyndaǵy Eýraziia ulttyq ýniversiteti Saiasattaný kafedrasynyń meńgerýshisi m.a. Janat Momynqulov Dalanews.kz-ke suhbat berip, sailaý nátijeleri týraly boljam jasady.
"Tramp álemdik saiasatta oiyp turyp oryn alady. Onyń ústine qazirgidei daǵdarys, soǵys jaǵdaiynda onyń is-qimyly - bári óte mańyzdy. Biraq Harris qalǵan jaǵdaida Amerikanyń osy saiasaty jalǵasa beredi. Qytaiǵa, Reseige, Iranǵa qatysty shekteý, tejeý saiasaty júredi.
Meniń oiymsha, Harristiń jeńisine qýanamyz. Al Tramp keletin bolsa, Reseimen qarym-qatynasyndaǵy ózgerister Ortalyq Aziiaǵa, bizge salqyn áser etedi. Bári ainalyp kelgende halyqaralyq júiege áser etedi. Biz boljap bolmaityn oqiǵalar bastalyp ketýi múmkin. Harris Ortalyq Aziiaǵa jańa bir kózqaras tanytýy múmkin, ol - Aq úidiń mańyndaǵy biýrokrattardyń ókili, turaqtylyqtyń "garantiiasy". Al Tramp kelse, Ýkrainadaǵy jaǵdai uzaqqa sozylatyn daýǵa ainalýy múmkin. Sondyqtan, meniń oiymsha, Harristiń kelgeni Qazaqstanǵa tiimdi. Ortalyq Aziiaǵa tikelei áseri bolmasa da, sheshimderi arqyly ainalyp kelgende áseri bolady", - dedi ol.
