رەسپۋبليكاشىلار اتىنان ۇمىتكەر دونالد ترامپ اقش پرەزيدەنتىن سايلاۋدا جەڭىسكە جەتتى. ەكىنشى باستى ۇمىتكەر كامالا حارريس مالىمدەمە جاسادى، - دەپ حابارلايدى Dalanews.kz.
اقش پرەزيدەنتتىگىنە دەموكراتتار اتىنان كانديدات بولعان ۆيسە-پرەزيدەنت كامالا حارريس رەسپۋبليكاشىلدار اتىنان تۇسكەن قارسىلاسى دونالد ترامپتى 2024 جىلعى پرەزيدەنتتىك سايلاۋداعى جەڭىسىمەن قۇتتىقتادى. ولار تەلەفون ارقىلى سويلەسكەن.
"دونالد ترامپ پەن كامالا حارريس سارسەنبىدە تاڭەرتەڭ تەلەفونمەن سويلەستى. حارريس ترامپتى تاريحي جەڭىسىمەن قۇتتىقتادى. پرەزيدەنت ترامپ ۆيسە-پرەزيدەنتتىڭ كۇشىن، كاسىبيلىگىن جانە تاباندىلىعىن جوعارى باعالادى، ەكى كوشباسشى دا ەلدەگى بىرلىكتىڭ ماڭىزىن مويىندادى"، - دەپ جازىلعان ترامپتىڭ سايلاۋالدى شتابىنىڭ مالىمدەمەسىندە.
كامالا حارريس سايلاۋدا جەڭىلگەننەن كەيىن جاقتاستارىنىڭ الدىندا ءسوز سويلەدى.
ۆاشينگتونداعى حوۆارد ۋنيۆەرسيتەتىنىڭ باس عيماراتىنىڭ الدىنا جينالعان جاقتاستارىنا سويلەگەن سوزىندە حارريس سايلاۋ ناتيجەلەرىن "قابىلداۋلارى كەرەك" ەكەنىن جانە بايدەن اكىمشىلىگى جاڭادان سايلانعان پرەزيدەنت ترامپقا، ونىڭ كومانداسىنا وتپەلى كەزەڭدە كومەكتەسۋگە دايىن ەكەنىن ايتتى. سونىمەن قاتار "بيلىكتىڭ بەيبىت جولمەن بەرىلۋىن" قامتاماسىز ەتۋگە ۋادە بەردى.
ايتا كەتەيىك، بۇعان دەيىن ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ مەڭگەرۋشىسى م.ا. جانات مومىنقۇلوۆ Dalanews.kz-كە سۇحبات بەرىپ، سايلاۋ ناتيجەلەرى تۋرالى بولجام جاسادى.
"ترامپ الەمدىك ساياساتتا ويىپ تۇرىپ ورىن الادى. ونىڭ ۇستىنە قازىرگىدەي داعدارىس، سوعىس جاعدايىندا ونىڭ ءىس-قيمىلى - ءبارى وتە ماڭىزدى. ءبىراق حارريس قالعان جاعدايدا امەريكانىڭ وسى ساياساتى جالعاسا بەرەدى. قىتايعا، رەسەيگە، يرانعا قاتىستى شەكتەۋ، تەجەۋ ساياساتى جۇرەدى.
مەنىڭ ويىمشا، ءحارريستىڭ جەڭىسىنە قۋانامىز. ال ترامپ كەلەتىن بولسا، رەسەيمەن قارىم-قاتىناسىنداعى وزگەرىستەر ورتالىق ازياعا، بىزگە سالقىن اسەر ەتەدى. ءبارى اينالىپ كەلگەندە حالىقارالىق جۇيەگە اسەر ەتەدى. ءبىز بولجاپ بولمايتىن وقيعالار باستالىپ كەتۋى مۇمكىن. حارريس ورتالىق ازياعا جاڭا ءبىر كوزقاراس تانىتۋى مۇمكىن، ول - اق ءۇيدىڭ ماڭىنداعى بيۋروكراتتاردىڭ وكىلى، تۇراقتىلىقتىڭ "گارانتياسى". ال ترامپ كەلسە، ۋكرايناداعى جاعداي ۇزاققا سوزىلاتىن داۋعا اينالۋى مۇمكىن. سوندىقتان، مەنىڭ ويىمشا، ءحارريستىڭ كەلگەنى قازاقستانعا ءتيىمدى. ورتالىق ازياعا تىكەلەي اسەرى بولماسا دا، شەشىمدەرى ارقىلى اينالىپ كەلگەندە اسەرى بولادى"، - دەدى ول.
