Resei áskeri Harkov qalasynyń Saltov jáne Kiev aýdandaryna basqarylatyn aviabombalarmen soqqy jasady. Saldarynan 38 adam, onyń ishinde 10 bala zardap shekti, dep habarlaidy dalanews.kz.
«Resei áskeri Harkovke basqarylatyn aviabombalarmen soqqy jasap, kópqabatty turǵyn úidi zaqymdady. Qazirgi málimet boiynsha, meditsinalyq kómekke 38 adam júgindi, olardyń 10-y – balalar», – dep habarlady Harkov oblystyq áskeri ákimshiliginiń basshysy Oleg Sinegýbov.
Soqqylardyń biri Saltov aýdanyndaǵy toǵyz qabatty turǵyn úige tigen. Aviabomba ǵimarattyń ekinshi qabatyna túsken, nátijesinde ekinshi jáne úshinshi qabattardyń qurylymdary qiraǵan. Birneshe turǵyn úi men avtokólik te zaqymdandy.
Zardap shekkenderdiń arasynda balalar bar. Qazirgi ýaqytta eki adam, onyń ishinde 14 jastaǵy qyz bala aýrýhanada jatyr. Dárigerler olardyń jarylys saldarynan alǵan jaraqattaryn emdep jatyr. Qalǵan zardap shekkender jeńil jáne ortasha deńgeidegi jaraqat alǵan.
Oqiǵa ornynda tótenshe jaǵdailar qyzmeti, meditsina qyzmetkerleri men politsiia jumys istep jatyr. Qiraǵan ǵimarattyń saldaryn joiý jumystary jalǵasýda.
Reuters agenttiginiń habarlaýynsha, buǵan deiin Harkov meri Igor Terehov Reseidiń basqarylatyn aviabombasy kópqabatty úige túskenin jáne keminde 22 adamnyń jaralanǵanyn málimdegen. Keiin zardap shekkender sany artqan.
