Belgili asaba, tamada Qasym Óteshev, kópshilikke "Han" laqap atymen tanys, 10 táýlikke ákimshilik qamaýǵa alyndy, dep habarlaidy Ozgeris.info.
Sait málimetinshe, mundai sheshim onyń jubaiy Almaǵa qatysty shyǵarylǵan qorǵanys nusqamasynyń talaptaryn buzýyna bailanysty qabyldanǵan.
Aqparatqa qaraǵanda, mamyr aiynyń ortasynda politsiia Qasym Óteshevke jubaiyna jaqyndaýǵa jáne onymen bailanys ornatýǵa tyiym salatyn qorǵanys nusqamasyn bergen. Alaida birneshe kúnnen keiin asaba Almanyń úiine barǵan.
Sol jerde erli-zaiypty arasynda janjal shyqqany aitylady. Oqiǵa ornynda bolǵan qurbysynyń sózinshe, áńgime tez arada daý-damaiǵa ulasyp, taraptar bir-birine aýyr sózder aitqan.
Osylaisha, áleýmettik jelide qyzý talqylanǵan otbasylyq janjal Qasym Óteshevke qatysty quqyqtyq máselege ulasty. Qorǵanys nusqamasyn buzǵany úshin ol 10 táýlikke ákimshilik qamaýǵa alyndy.
Málimetke súiensek, tamada jaqyn kúnderi bostandyqqa shyǵýy tiis.
